ABC: Tene actividad festivo na brug nobo Spaans Lagoen ta malo

ORANJESTAD – No mester ta permisible pa ‘molestia’ e area na Spaans Lagoen conoci internacionalmente como ‘wetland’. Asina Aruba Birdlife Conservation (ABC) ta remarca riba Facebook awe, reaccionando riba e evento cu tin relaciona cu e apertura di e brug di Spaans Lagoen. NoticiaCla e siman aki ainda a raporta riba e invitacion cu a bin pa comunidad di parti di e contratista, relaciona cu e hecho cu diabierna awor e brug ta wordo habri 'oficialmente'. “Nos ta spera cu esnan cu a duna e permiso pa e evento aki, compronde cu e brug ta cruza un ‘Ramsar Wetland area’ cu tambe ta oficialmente parti di Parke Arikok” e grupo ta sigui bisa.

DISTURBIO

Segun ABC, riba 120 tipo di pahra ta registra na Spaans Lagoen, y e ta un lugar importante pa cria pahranan ‘residente’ y mes momento e migracion di pahra tambe a cuminsa. Esey ta nifica segun ABC, cu hopi especie di pahra lo bishita e localidad aki pa recobra forza despues di a bula distancianan largo.

ZONIDO

“Zonido di musica duro y extra luz lo tin un impacto negativo riba e area sensitivo di naturalesa y como tal no mester wordo permiti, prome, durante of despues di e ceremonia”. Nan ta mustra cu tin otro area cu ta mas apropia pa tipo di actividadnan festivo asina. “E Ramsar Wetland aki no ta un di nan”. Ademas a haci un peticion pa organisadornan tene cuenta pa cupsnan di plastic, straw of tayo wordo tira den e lagoen. “Actividadnan festivo mester tuma lugar otro caminda”, ABC ta finaliza bisando.