MEP cu carta pa Plasterk pa publica rapport final CFT awor

ORANJESTAD – Minister hulandes pa asuntonan di Reino Hulandes Ronald Plasterk tin cu reconsidera su decision pa cu e rapport di CFT, y duna parlamento di Aruba un copia. Esaki ta e base di e contenido di e carta cu fraccion di partido den oposicion MEP a manda dialuna pa e mandatario hulandes.

Despues cu NoticiaCla.com tabata esun cu a duna indicacion di e rapport un dia prome, y cu despues riba diabierna tabata esun cu e primicia ora cu e rapport a keda entrega na gobernador interino Ella Tromp Yarzagaray, no a mira e rapport mas. Esaki pasobra a dicidi cu ta duna gobierno di Aruba tres siman pa repasa e rapport final y duna su comentario riba e recomendacionnan aki.

Sinembargo, ora cu cierto medionan via e.o. facebook y e website di noticia 24ora.com tambe a publica cierto fragmento for di e rapport diabierna, tabata conoci cu e rapport aki toch lo a ‘leak’. Esey a pone cu partido MEP mesora a manda un carta pa e mandatario (lesa e contenido di e carta aki) cu e peticion pa parlamento haya e rapport aki, mirando e importancia di esaki pa cu comunidad di Aruba. Y ademas, segun e partido, e rapport inicial ya caba ta publico caba. Copia di e carta aki a bay pa gobernador di Aruba tambe.