Experto fiscal Peter Kavelaars a comparti su conocemento cu sector local

ORANJESTAD – Diahuebs merdia a tuma luga un sesion di Entrenamento Technico caminda algo mas di 40 funcionario di Departamento di Impuesto a participa na esaki. E oportunidad valioso aki pa expertonan fiscal di Aruba, tabata posibel danki na Deloitte Aruba.

E encuentro den espacio di e Kantine di edificio Dr. Armand Engelbrecht na Camacuri a conta cu un atencion total di parti di e participantenan. Nan a sigui hopi di cerca e informacion nan cu Prof. dr. Kavelaars a trece dilanti y realisa preguntanan al caso. Algun di e topiconan cu Prof. dr. Kavelaars a presenta durante su sesion interesante aki tabata: pensioen in eigen beheer, fiscale eenheid, jurisprudentie onzakelijke leningen, UBO register, informatieuitwisseling y tambe dividenbelastingplicht cooperaties.

Prof. dr. P. Kavelaars ta un academico di Economia Fiscal na Erasmus School of Economics na Erasmus Universiteit Rotterdam y for di 2016 a uni como academico extraordinario di Ley Fiscal y Economia na Universidad di Corsou. E tabata director di e Oficina Cientifico di Deloitte Belastingadviseurs na Rotterdam, di cual ela bira un socio na 1997.

Tambe a carga posicion como Inspector di Rijks Belastingdienst apunta na e grupo di expertonan den Finanzas Publico y Derecho Fiscal na Erasmus Universiteit Rotterdam. Adicionalmente Prof. dr. Kavelaars ta redactor di varios publicacion specialisa y co autor di bukinan riba tema fiscal. Tambe ta relevante pa menciona cu e specialista aki tabata miembro di e Comision Inkomstenbelasting en Toeslagen (Commissie Van Dijkhuizen).

E conocemento cu Prof. dr. Kavelaars ta comparti, ta yuda prepara nos profesionalnan local pa un futuro innovacion di nos structura estatal, ademas di ilustra con por atende cu casonan specifico. Practica di Ley Fiscal ta un tema hopi compleho y specifico. Deloitte Aruba ta kere cu ta bon pa, den su ehecucion, mantene na bista e angulo humano y economico; esey ta e motibo pakico Deloitte Aruba a tuma e iniciativa aki.

Deloitte Aruba kier a gradici Departamento di Impuesto y tur esnan cu a presencia e sesionnan tecnico y atardi di informacionnan aki na Aruba posibel.