Dowers: No tin 61 atraco sino 40 te awor den 2017

ORANJESTAD – No tin 61 atraco cometi na Aruba den 2017 (te cu awor) sino 40. Por lo menos segun cifras cu e titular di husticia Arthur Dowers ta dispone di dje. Asina el a declara durante su programa riba su pagina Facebook dialuna anochi. E mandatario ta culpa opositornan, principalmente di MEP y POR cu ta ‘fomenta’ informacion incorecto y cierto medionan di comunicacion, (aunke e no ta haci mencion di cua medio). Segun e mandatario, tin casonan cu a wordo raporta como atraco, pero cu en realidad no tabata atraco. E ta menciona cu tin por lo menos 7 caso di atraco cu a keda raporta como tal, pero cu a resulta di no ta atraco. NoticiaCla mes a bay check e noticianan cu a keda publica di comienzo di aña y tambe a yega na e cifra di 40.

CANTIDAD

Tabata na april (dia 23 di april 201)7) cu e portal aki a resumi e cantidad di atraco cu tabatin den e prome 4 lunanan, y a yega na e cifra di 24. Pues den apenas 4 luna un record di 24, di cual 12 so caba tabata na januari y cu 6 tabata den apenas un siman di tempo despues. For di e fecha ey pa awe, NoticiaCla a recorda 15 atraco (cu tabata atraco) cu a keda raporta oficialmente segun polis. NoticiaCla ta basa su mes puramente riba informacion ricibi di voceronan di polis asina cu tin un atraco. Pues ora cu nan raporta un noticia di atraco. Y for di e noticianan ey, tin 15 nota di april 23 te cu awor.

NOTICIA FALSO

Mester remarca cu e mandatario den pasado a cuestiona e portal aki tambe su informacionnan di atraco, unda cu lo tabatin atraco cu a tuma lugar cu despues no tabata atraco. Entre nan tabatin uno di P’erle Dor y un otro caso mas recien. A culpa e portal aki di ta fomenta noticia incorecto e tempo ey. Pero a mustra e mandatario e tempo ey caba cu tabata polis mes cu a raporta esaki como atraco, y cu despues a resulta cu no tabata atraco y cu nan mes a rectifica esaki. Pues no tabata e portal aki cu a raporta robes, sino a sigui informacion di polis.

ATRACO AWE

Awe mainta mes tabatin caso di atraco cu a resulta despues cu no tabata atraco. Por lo menos segun terminologia di polis. Na prome instante a raporta esaki como un atraco unda cu te hasta atraco team a presenta. Pero ta despues di e presencia di e team, a bin compronde cu no ta un atraco, debi cu no a atraca e persona, sino a bay cu articulo si, pero no como un forma di atraco. Esaki a keda discutible, pasobra den pasado tabatin casonan di atraco unda cu a drenta un of otro negoshi, y a comete un atraco riba e negoshi y no riba e persona y a bay cu material. Pues e situacion ta kico ta atraco y kico no y kico polis ta raporta como atraco of ta considera atraco. Hecho ta, cu oficialmente segun minister di husticia (e ta e unico cu ta publica e cifranan pasobra polis a bisa e portal aki cu ‘no tin cifra’, ta 40 atraco a tuma lugar, y no 61 manera ta wordo bisa eyfor.