Bochincha den prison Point Blanche despues di intento di asesinato

PHILIPSBURG – Situation den prizon Pointe Blanche ta intrankil despues cu Carlos Richardson a comete un atentado riba Urvin Wawoe, miho conoci como rapper Nuto i lider di e gang notorio di Koraal Specht ‘No Limit Soldiers’.

Aña pasa den apelacion a condena Richardson pa 29 aña i nuebe luna pa dos asesinato, intento di asesinato, intento di homicidio i miembrecia di un organisacion criminal. Ta bisa cu el a menasa Wawoe cu un pistol, pero e rapper a bini bek p’e cu un machete improvisa i a herida Richardson gravemente cu esaki.

Richardson ta den intensive care bou di custodia di polis den Centro Medico Sint Maarten pero segun Ministerio Publico (OM) e no ta den peliger di bida.

Arma di candela

Despues di e confrontacion entre Richardson i Wawoe a confisca dos arma di candela. Polis a controla e prizon riba arma i otro contrabanda i a uza cacho tambe den e control aki. E listramento aki a resulta den un cantidad alarmante di arma improvisa manera cuchiu i machete. A haña un carson djabou di hende muhe tipo ‘g-string’ tambe.

Cocaina

Wawoe tin un sentencia di ocho aña. Na 2012 a gare cu casi cuater kilo di cocaina. Corte a conden’é tambe pa labamento di placa i miembrecia di un organisacion criminal.

Castigo di bida largo

Presencia di Wawoe den Pointe Blanche tabata e motibo cu OM na Corsou a blokia e traslado di Dangelo Damascus, un sospechoso den e asesinato di Helmin Wiels, pa Sint Maarten. Damascus a hasi declaracionnan contra Elvis Kuwas, un miembro di No Limit Soldiers cu a haña castigo di bida largo pa e asesinato riba Wiels.

For di Red Karibense Autor: Hilbert Haar