CITGO y PDVSA exclui di sancionnan Mericano contra Venezuela

WASHINGTON - E ultimo regimen di sancionan contra gobierno Venezolano, ta exclui Citgo Petroleum Corp. Asina departamento di finanza di gobierno Mericano a bisa den un memo diabierna cu NoticiaCla tin den su poder. Segun e documento, conforme e 'licencia general # 2', e ta autorisa cierto transaccionan envolviendo CITGO Holding Inc. Minister di Economia di Aruba Richard Arends a confirma esaki pa NoticiaCla, indicando cu e situacion aki no ta afecta Aruba consecuentemente tampoco. 

MEDIDA

E ultimo regimen di sancion contra Venezuela tabata pa straf e gobierno pa a cambia e constitucion di e pais pa asina consolidad su poder. E sancionnan di diabierna, tabata pa prohibi companianan Mericano di tin cierto relacionan comercial, y exclui Venezuela grandemente di e economia Mericano, incluyendo su mercado y capital.  Pero CITGO lo sigui opera normal. E motibo di e 'excepcion' aki, ta pa mitiga e daño na e pueblo Venezolano y Mericano. Importacion y exportacion di petrolio, tambe ta exclui. "Nos ta emitiendo licensianan general permitiendo transaccionan cu di otro forma lo tabata prohibi bou di e orden di sancion". Un di e prohibicionan si, ta cu CITGO lo no por manda dividendo pa su compania madre, PDVSA. CITGO tin varios compania cu ta lobby e gobierno Mericano. Adicionalmente, donacionan generoso di entre otro CITGO y PDVSA tambe por a yuda cu e excepcion aki a bin di e forma aki.