Sindicato FTA a gana referendum na Telearuba

ORANJESTAD - Awe tardi a tuma lugar e referendum yama door di Mediador di Gobierno bou di e trahadornan di Tele Aruba, kendenan a solicita representacion di FTA pa nan asuntonan laboral. Den e caso aki, NoticiaCla a compronde cu 12 trahado a vota na fabor di e sindicato, ganando asina e representacion. FTA den pasado pa casi 40 aña a representa empleadonan di nos planta nacional di television y awe tardi e representacion aki a reanuda, despues cu unanimamente e trahadornan cu a bin deposita nan voto, a scoge FTA como nan sindicato. FTA ta contento y alabes agradeci cu e empleadonan di Tele Aruba, kendenan un bes mas a confirma nan confiansa den e sindicato pa atende cu nan asuntonan laboral.

E PROBLEMA

Tabata fin di luna pasa cu Telearuba y sindicato FTA a haya otro pa cu e asunto di referendum. Esey ta nifica cu ambos partido a bay di acuerdo cu e fecha pa tene e referendum pa reconocemento di e sindicato, cu mester tabata riba 31 di augustus proximo. “E trahadornan a bay di acuerdo cu esaki” Hubert Dirksz, presidente di FTA a bisa NoticiaCla e tempo ey. “Loke si nos ta lamenta ta cu na cierto momento gerencia ta insisti pa haya prueba di formulario di miembrecia yena pa e 14 empleadonan despues cu ya caba nan a ricibi informacion cu nomber y id for di mediador di gobierno” e presidente a sigui bisa. “Maske nos no tin problema en absoluto pa informa esaki, pero e ta mustra un falta di confiansa. Nos opinion ta cu e derecho di trahador pa bira miembro di un sindicato no mester wordo stroba. Nos ta spera cu e negociacionnan por bay den un bon ambiente” Dirksz a finaliza bisando. Sinembargo e referendum a tuma lugar awe tardi caba cu e resultado conoci.