Canalnan ‘prominente’ Mericano cubriendo caso Holloway

ALABAMA – E noticia di Natalee Holloway diabierna un biaha mas tabata riba practicamente tur canal di television ‘importante’ manera ABC News (Good morning America) y Inside Edition, pa raporta riba e resultado di e testnan haci di DNA riba ‘wesonan haya na Aruba’. For di e raportahenan, ta resulta cu ta weso humano di un ser femenino europeo, ‘manera Natalee Holloway’. Nan ta papia di informe ‘no oficial’, pero ta core e noticia si. Mes momento nan ta haci mencion di e hecho cu autoridad di Aruba ta refuta e anuncio, y cu Aruba ta para ariba cu ta weso di bestia.

PAKICO E TA NOTICIA

Mientras cu cada bes ora cu e noticia aki plama, e ta haya atencion internacional, localmente (na Aruba) e ta crea rabia y angustia pakico ta ‘bolbe’ trece e noticianan aki dilanti. Den e caso aki, mester raporta cu e ta bira noticia ora cu canalnan considera como ‘prominente’ y cu riba cual te hasta Aruba ta haci propaganda na Merca, Ta cuminsa pasa e informacionnan aki como noticia. Esey ta e esencia den e caso aki, unda cu mientras cu na Aruba ta keha di e noticianan aki, e mesun audiencia cu Aruba ta purba atrae, ta wordo confronta cu e noticianan aki.

PROGRAMA

Bek pa e noticia mes, tur ta den cuadro di e promocion pa e serie di 6 programa dedica exclusivamente na e tema aki, cu ta pasa riba e canal Oxygen tur diasabra anochi pa e proximo 5 simanan. Tabata e ekipo di filmacion di e canal aki cu a sigui Dave Holloway (tata di Natalee Holloway) cu a biaha bin Aruba varios biaha durante e periodo cu nan tabata ‘busca y haya’ e ‘restonan’ na cierto sitio riba nos isla.

MINISTERIO PUBLICO

Recientemente ora cu NoticiaCla a bin cu e informacion ‘nobo’ aki, ministerio publico despues di algun dia a dicidi di emiti un comunicado pa contraresta e informacion cu tabata circula. Nan a categoricamente desmenti cu ta trata di restonan humano y cu ta di bestia. Tambe, cu ta castigabel pa ley si un persona transporta restonan di un persona afo.