Ausencia di tres partido no a stroba debate politico Latino

ORANJESTAD – E debate pa comunicado Latino no tabatin mucho publico pero e mensahe si a yega. Y e hecho cu no tabatin 3 partido presente, no a stroba e debate di tuma lugar. Asina organizador di e evento Win Donata a bisa NoticiaCla despues di e evento. Partido AVP y CURPA tabata ausente y RAIZ a bandona e evento ora cu esaki a cuminsa. Asina mes e evento a cuminsa y a desaroya den un intercambio di informacion, basa grandemente riba temanan cu ta toca e comunidad Latino. Cu un 9 mil Latino cu derecho di voto pa dia 22 di September, esaki ta representa por lo menos 3 asiento. Y Segun e moderador Wilmer Aristizabal, ta suficiente motibo pa e grupo aki ta bon informa.

TEMANAN

For di LTU, asunto di permiso, trato social y e modelo SUIZO. Manera tabata e caso na e ultimo debate di KVk, aki tambe no ta solamente lidernan politico sino tambe otro candidatonan a haya chens pa profila nan mes. Mayoria di e candidatonan a opta pa respeta e peticion di papia na spaño, mientras cu otronan a para ariba cu ta papiamento ta wordo papia pasobra tur latino cu por vota, mester por papia papiamento.

AUSENCIA

Partido CURPA su lider a ‘meld ziek’, mientras cu partido berde AVP simplemente tabata un ‘no show’. “Nan simplemente no a presenta. Nos no sa pakico”, Winston Tavares di e fundacion dominicano a bisa NoticiaCla. Partido RAIZ tabata presenta na comienzo pero a bandona e lugar debi cu nan no tabata satisfecho cu e organisacion y e hecho cu partido AVP no a presenta.