RdA ta lidera comision pa implementa programa di certificacion pa trahadonan local

ORANJESTAD - Expo Labor 2017 a tuma luga diasabra ultimo. Refineria di Aruba N.V. (RdA) tabata un di e companianan presente y tabata ofrece tur informacion necesario na e publico presente. Durante Expo Labor, por a constata hopi interes den e sector di energia. Hopi persona a acerca e booth di RdA pa asina cera conoci mas di cerca cu e compania estatal. E team di RdA a probecha pa haci un encuesta electronico midiendo e interes y e conocemento di e structura nobo di Refineria di Aruba. Aunke RdA ni FMSA na e momentonan aki tin vacatura, a probecha pa brinda informacion na nos comunidad durante e expo di diasabra ultimo.

Banda di esaki a marca un momento importante na unda Minister di Labor Angel Bermudez y Minister di Economia Richard Arends, a haci entrega di e “Ministeriele Beschikking” na Managing Director & CEO di RdA, Alvin Koolman, anunciando oficialmente instalacion di un comision pa implementa un programa di certificacion enfoca riba e sector di energia. E comision lidera pa RdA cu participacion di profesionalnan den departamento di Labor y Enseñansa tin un periodo di tres luna pa finalisa e structura y plan definitivo di e programa di certificacion menciona.

Gina Maduro, HR, Training & Development Manager di RdA, ta sigui bisa cu e prioridad principal lo ta pa desaroya e contenido di e programa. Intencion di traha estrechamente cu Ministerio di Labor y di Enseñansa pa asina den futuro por incorpor’e den e sistema di educacion di Aruba. Esaki lo yuda e personanan local cu kier un trabao den e sector di energia, manera Refineria (Citgo Aruba), Utilities (Elmar, WEB Aruba) y otro companianan, lo por haci uzo di e programa aki di certificacion.

Ora cu RdA tin vacatura habri esaki lo wordo poni riba e pagina di Facebook di RdA y den corant. Pa mas informacion por comunica cu Refineria di Aruba N.V. via su pagina di Facebook of por manda un e-mail na info@rda.aw.