Eman: No obstante su detencion, Paul Croes ta keda minister

ORANJESTAD – Gabinete Mike Eman II no ta pidi retiro di minister Paul Croes. Asina prome minister Mike Eman a bisa diaranzon mainta durante su prome reaccion despues di detencion di colega minister Paul Croes. Segun Eman, gobierno a haci tur loke mester a haci den e caso aki, cu ta e.o. encera pidi'e pa su carteranan, lague un minister sin cartera y laga ministerio publico haci su trabou. Pero ora cu a puntra si awor cu Croes ta deteni, e mester baha como minister, Eman a contesta “Absolutamente cu no”. A splica tambe cu no a mira e necesidad di bin cu un conferencia di prensa riba e tema ya cu e pensamento riba e caso no a cambia. Ora cu e portal aki a puntra pakico anto a warda dos dia siendo cu e contesta tabata cla caba, e mandatario a opta pa sacudi cabes y keda keto.

REACCION

Eman su prome palabranan tabata ‘Convivencia y solidaridad hopi grandi cu Paul Croes y su famia. No ta momentonan hopi facil’. E mandatario a splica tambe cu manera indica anteriormente, gobierno a tuma e pasonan caba necesario y cu e detencion di Croes, esaki no a cambia. A referi aki na e decision pa conforme ley di otro paisnan cu si tin e caso aki bon regla, laga Croes cu su funcion di minister bou di e pensamento cu e no ta condena y ta aworaki den un proceso legal. Y segun e leynan cu a studia y consulta, den un situacion asina, no ta necesario pa Croes haya su retiro como mandatario. Pues cu e detencion, pero sin condena, e situacion no a cambia. A confirma tambe pa e portal aki cu e cambio cu nan a dicidi pa uza, lo mester bay via un cambio di staatsregeling. Sinembargo e cambionan den practica no ta completa debi na su tardansa, y a meramente actua riba dje anticipando e cambio.

SILENCIO

E mandatario a uza e momento di inicio di bashamento abou di e ruina di Bushiri Hotel, pa duna prensa su prome reaccion. Prome cu esey, el a opta pa no bisa nada, no obstante cu na varios occasion tanto e portal aki como otro medionan (manera Caribisch Netwerk y Bondia Aruba) a busca Eman pa contesta. Pero cada bez tabata nenga pa bisa algo. Ta diamars atardi, a compronde cu e intencion tabata pa eventualmente duna prensa un reaccion na e evento di Bushiri. Esey a pone tambe cu contrario na actonan normal, tabatin un interes increiblemente grandi di prensa, meramente pa e reaccion di e prome mandatario. 

E CASO

Pa loke ta e caso mes, abogado di Croes, esta Marije Vaders mester a yega Aruba ayera, y comunica cu su cliente. Mester tabatin un conferencia di prensa, pero esaki no a materialisa ainda y ta pendiente pa esaki ainda. Den curso di awe, a compronde cu Croes a acudi na Landsrecherche pa su interogacion. Ademas, aunke no confirma, e portal aki a compronde cu e mester a wordo atendi riba su detencion y wak si ta prolonga esaki cu 8 dia. Keda pendiente pa e informacion aki.