UA ta desmenti cu nan ta conduciendo encuesta electoral

ORANJESTAD - Universidad di Aruba a ricibi informacion cu tin persona(nan) ta yamando den nomber di Universidad of sugeriendo cu nan ta di Universidad di Aruba, puntrando informacion ariba nan escogencia di voto pa eleccion pa parlamento venidero. Como tal a dicidi di emiti un comunicado pa informa comunidad di Aruba cu nan no ta conduciendo un encuesta electoral y ta pidi e persona(nan) cu ta yama diferente persona di nos comunidad uzando e nomber di Universidad di Aruba pa por fabor stop di haci esaki inmediatemente.

SETAR 

For di Setar, oficialmente tambe NoticiaCla a compronde cu nan tampoco no ta participando den uno. Ademas nan a sigura cu nan, esta ‘SETAR no ta duna ni bende informacion di su clientenan nunca’. “Esey nos clientenan por ta sigur di dje” vocero di e compania di telecomunicacion esta Suzy Maduro a sigura e portal aki diamars atardi.

KEHO

For di diadomingo caba e portal aki a bin haya keho di hendenan cu a ricibi yamada di cierto damanan latino cu tin un medio accento papiamento, cu e pretexto cu nan ta trahando pa Universidad y ta haciendo un encuesta. Loke e personanan aki a bisa e portal aki, ta cu mas insolito ta, cu nan ta wordo puntra pa ken nan ta vota. E kehonan a keda reparti riba e.o, Facebook tambe.