Prome minister Eman ainda keto riba detencion Paul Croes

ORANJESTAD – Gobierno di Aruba (cu excepcion di minister Angel Bermudez) y partido AVP ta keto riba e caso di detencion dialuna di colega y minister Paul Croes. Despues di e detencion, NoticiaCla y varios otro medio a busca contacto cu tanto prome minister como otro coleganan, pero no tabata exitoso. E unico miembro di gobierno cu a duna un reaccion cortico, tabata Angel Bermudez. Pero e otro coleganan a opta pa no bisa nada ainda. Diamars a compronde cu e prome mandatario lo ta dispuesto pa duna su prome reaccion na ocasion di ‘groundbreaking’ di e proyecto nobo na lugar di Bushiri Hotel.

REACCION BERMUDEZ

E mandatario encarga cu finanzas durante e programa ‘NoticiaCla LIVE' tabata breve riba e tema. Ora cu a puntre si ela wak e eclipse solar dialuna, ela contesta “No, mi no a wak e pasobra bisabo francamente mi no tabata sa ki ora e lo tabata precies” Bermudez a bisa. “A compronde mainta tempran cu e dia a cuminsa cu un eclipse solar pa politica en general y famia di Paul Croes en especial y su famia. First Reaction, dialuna mainta lanta habri telefon y prome cos cu bo ta lesa den tur e mensahe nan ta waw, esey si ta un comienso di siman. Hopi lamentabel “ refiriendo na e detencion di su colega.

REACCION PARTIDO

For di dialuna e portal aki y demas miembronan di prensa tabata busca un reaccion, pero a dal den bashi. Ora cu a topa lider di fraccion di e partido berde, Marlon Sneek, prome ela bisa cu ta ‘laga husticia cana su caminda’, y despues ‘mi no tin comentario’. A compronde pues cu e prome mandatario y como lider di partido lo duna un comentario diaranson awor. Keda pendiente pa e informacion aki.