Van Dam: Limita informacion pa abogado di Paul Croes no ta inusual

ORANJESTAD – E hecho cu abogado di minister Paul Croes no tabatin acceso, of hopi limita –manera Procurador General Alexander van Dam mes a admiti awe mainta-, ta algo normal. Van Dam a admiti cu a limita e acceso na informacion pa e abogado, y cu e informacion enberdad tabata hopi ‘sumier’(poco), pero cu esaki tabatin un motibo. E pregunta a bin di parti di NoticiaCla na PG, mirando cu e abogado di Croes, Marije Vaders a cuestiona e practica aki durante su conferencia di prensa algun luna pasa. E momento ey Vaders a referi na e practica aki como algo incomprendibel y nunca bisto den su periodo como abogado. E abogado a bisa e tempo ey cu e no por a compronde con bin e no tabata haya informacion y ta cada bes danki na casonan cu e mester a entama, ela haya cierto acceso, pero no suficiente na material cu e por a traha un defensa pa su cliente. Pero segun ministerio publico, no tin nada straño na esey y constantemente ta haci e practica ey, esta limita cierto informacion na abogado di un of otro sospechoso. Y den e caso aki e no ta diferente.