‘Hoben y Talentoso’ a reconoce 32 hoben local

ORANJESTAD – Diadomingo anochi Gabinete Mike Eman pa di 5 aña consecutivo a duna nos hobennan un reconocemento. “Ta un placer y un honor di por pone spotlight riba e ciudadanonan hoben aki cu, for di ya caba, ta un ehempel pa nos comunidad,” Prome Minister Mike Eman a expresa durante apertura di e evento.

HOBEN

Un total di 32 hoben a ricibi un plakkaat di reconocemento for di man di e mandatario hunto cu e palabranan di elogio y aplauso di invitadonan special y publico presente. E hobennan reconoci ta resalta den terenonan di deporte, educacion, innovacion, musica, como empresario, den arte y tambe pa e proyecto di Formacion Social, cual tambe, mescos cu Hoben y Talento, ta un iniciativa di Gabinete Mike Eman.

LUSTRO

Durante su cinco aña di existencia, Hoben y Talentoso a reconoce, elogia y resalta e bon ehempel di mas di 125 hoben di Aruba. Gobierno ta desea cu Hoben y Talentoso por continua pa hopi aña mas pa sigui resalta e Arubianonan cu for di un edad trempan no solamente ta desaroya na talento, pero tambe ta fungi como ehempel pa hopi otro hoben den nos comunidad.