Arends: Intencion ta pa begrotingskamer reemplasa CAft otro aña

ORANJESTAD - Enberdad gobierno di Aruba ta trahando pa bin cu su propio supervision financiero otro aña. Asina minister di economia Richard Arends a bisa NoticiaCla den fin di siman. E reaccion tabata riba e declaracion di minister di relacionnan di Reino, Ronald Plasterk na Aruba siman pasa. Aki ela bisa cu e ta sostene pensamento di ex presidente di e conseho di supervision financiero CAft pa tin un tipo di supervision financiero permanente. Arends den e caso aki ta papia di Aruba su propio 'begrotingskamer'. 

BEGROTINGS KAMER

E camber di presupuesto, traduci for di Hulandes, ta un idea -segun Arends- di 2012 caba cu gobierno di Aruba ta trahando ariba pa asina percura pa tin e control continuo despues cu CAft termina su trabou na 2018. Manera ta conoci, otro aña e intencion ta pa CAft pasa 'pa historia', ora cu e 'norma' estableci wordo logra pa Aruba, y cu ta nifica cu Aruba a logra baha e deficit di tal forma cu e por bin na remarke pa haya fiansa riba mercado internacional cu un tasa di interes abou. Mester bisa cu a tende hopi di esaki, pero cu e no por a keda materialisa ainda. Siman pasa ainda a puntra e mandatario di Hulanda riba e tema y ela sigura e portal aki cu durante su combersacion cu minister di finanza di Aruba Angel Bermudez, e ultimo aki a bisa cu e supervision lo continua den un forma of otro, aunke e palabra 'begrotings kamer' no a cay e momento ey.