Candelaria no ta ambiciona pa bira proximo korpschef

ORANJESTAD - Candidato di partido AVP Robert Candelaria no tin ambicion pa bira comisario di polis. "No, mi no tin ambicion" Candelaria a bisa den e programa NoticiaCla LIVE recientemente, ora cu a puntr'e riba e 'rumor' cu ta circulando cu e ta e persona cu tin cu bay reemplasa actual comisario di polis Dolfi Richardson. Funcion di minister ta un opcion, pero tambe a puntr'e si e ta dispuesto pa bay Parlamento si nan logra gana eleccion na september. Pero nada di deal pa bira e proximo hefe di polis, no ta berdad. 

LAMENTO

Segun Candelaria, e ta lamenta profundamente cu e informacion ey ta eyfo y cu ta circulando. "E ta un informacion sin pia, sin cabes" e candidato politico a sigura den e programa cu a pasa diabierna riba Facebook. "Mi ta hay'e hopi erg. Mi no ta ambiciona pa e funcion ey". A sigura cu no tin nada di berdad di e informacion ey. Ademas, no tabatin ningun trahamento di deal pa e por a drenta e partido como nobato y mesora subi na posicion number 7, un posicion hopi halto pa un nobato subi riba un lista di un partido cu ta den gobierno. 

FRICCION

Pa loke ta e situacion entre e cu actual minister di husticia Arthur Dowers, Candelaria a splica cu ta netamente e motibo pa evita un percepcion cu lo tin un rivalidad entre e y Dowers, a dicidi cu Dowers ta introduci su persona ora cu ela lansa su mes como candidato. E ta conciente cu e tin e bagage pa por bira un proximo minister di husticia, pero nada di esey no a wordo palabra. "E focus awor ta pa nos gana eleccion" Candelaria a bisa. Despues eventualmente por papia riba esey. Pero ni pa korpschef y tampoco a duna garantia cu e lo bira e proximo minister di husticia si e partido bolbe haya e mandato pa ta den gobierno. A splica Candelaria cu e base di e rumornan ta cu un persona cu tabatin bon trabou riba un otro isla, no ta bay laga esaki, muda cu su famia bek pa un otro isla y despues di cos no bay bon pa e partido, e keda perhudica. Y cu ta p'esey a dun'e e number 7 pa por lo menos e tin un tipo di garantia cu kico cu pasa, e ta safe pa cu trabou.