Plasterk: Cauteloso riba plan pa atende cu influx di Venezuela

ORANJESTAD - Hulanda ta preocupa cu hopi hende di Venezuela lo por bin Reino Hulandes, particularmente islanan Aruba y Corsou. Asina minister di asuntonan di Reino Ronald Plasterk a bisa recientemente durante un bishita relampago di despedida na nos isla. Mes momento e ta mustra cu e problema primordialmente no ta esun di posibel refugiado, sino e crisis economico cu por stroba e turista Venezolano di bishita nos islanan. Esaki pasobra esey ta un mercado importante pa e islanan aki. Pa loke ta e plannan pa 'ricibi'  un posibel grupo grandi di Venezolano pa Aruba, e mandatario no kier a bisa mucho. Ora cu a presiona e mandatario, a mustra cu mester ta cauteloso kico pa bisa publicamente, pa no crea un situacion cu por perhudica nos despues. 

PASONAN SPECIFICO

Unico cos cu e mandatario tabata dispuesto pa bisa, ta cu ta trahando incansablemente riba e tema cu plannan pa atende cu e posibel scenarionan. "Nos a haci esaki na Aruba tambe y a papia riba e tema, pa wak ken tin cua tarea, reparticion di trabou, wak pa tur canal (di comunicacion) ta hancho habri pa informacion y accion. Y cu nos no sorprende otro (pa posibel falta di comunicacion)" Plasterk a bisa. Ela bisa mas aleu cu e no por bay den detaye riba tur punto. Ni maske con hopi prensa a presiona e mandatario, ela keda hopi 'global' y tabata contesta solamente cu e 'no ta bay duna ningun detaye specifico'. Tur pa motibo di seguridad. "Di un banda nos mester pensa bon riba e varios scenarionan cu lo por presenta, y di otro banda cu no ta den interes di e islanan pa presenta tur e scenarionan publicamente. P'esey mi ta keda cauteloso cu dunamento di informacion".