Gerente RIU: Victima di trafico Joel Dirksz un excelente persona!

PALM BEACH – E noticia di morto tragico di Joel Dirskz (24) awe mainta a dal duro na trabou di Dirksz. Na bida e tabata store manager di Riu Palace y masha stima mes pa tur hende. “Excelente persona” tabata reaccion di gerente di Riu Palace Juan Blanco na NoticiaCla diasabra. “Persona excelente cu a base di trabou, dedicacion y esfuerso, a subi varios posicion y a converti su mes den un figura asina importante pa e hotel, pa ta esun encarga di ricibi tur mercancia cu ta drenta (hotel) diariamente” Blanco a sigui bisa. Segun Blanco, Dirksz tabata un persona masha yega na ambos gerente di e hotel. Blanco a splica e portal aki cu 3 aña pasa ela cuminsa traha como security, pero manera indica caba, rapidamente a subi den rango y na ultimo pues, tabata store manager di e hotel, cu apenas 24 aña. E portal aki por a compronde cu e trahadonan tambe ta hopi afecta pa su morto.

E ACCIDENTE

Manera e portal aki a raporta caba awe mainta, Dirksz a bira e di 2 morto den trafico pa 2017. Oficialmente e raportahe ta cu awe diasabra madruga pa mas o menos 4:20 yamada ta drenta na central di polis cu na altura di cas Savaneta 314 un auto bayendo direccion ariba a bolter y pega candela. Na yegada di e patruya di polis ta bin topa cu e auto Yaris A - 62967 color blauw cla y cu tabata na candela. A pidi pa brandweer di biaha y ambulance. E pasahero a logra sali for di e auto, pero e chauffeur si no a logra sali. Pa 5:30 dr Texier ta constata morto di Jonathan Joel DIRKSZ, naci na Aruba 13-2-93 .