SER: Aumento salario minimo no a cana conforme ley

ORANJESTAD - Aumento salario minimo recien, no a cana segun ta stipula den ley. Asina Sociaal Ecocomische Raad (SER) a informa den un comunicado diabierna atardi. Nan ta sigui mustra cu nan no a wordo scucha den caso di aumento di salario minimo. Asina e organo aki ta bisa pa medio di un comunicado di prensa diabierna. Segun SER, ta via e medionan di comunicacion nan a tuma nota di e decision di gobierno di Aruba pa aumenta e salario minimo entrante 1 di augustus 2017. Pa verifica locual a sali den medionan di comunicacion SER a bay sondea e documentonan oficial cu ta haci aumento aki posibel cual a resulta di ta e Landsbesluit, houdende algemene maatregelen di 21 di juli (AB 1989 no. GT 26) (tussentijdse aanpassingen augustus 2017) y tambe e corespondiente Nota van Toelichting.

Despues di a studia e dos documentonan aki, SER tin cu remarca cu e proceso aki no a cana segun ta stipula den ley.

E proceso di aumento di salario minimo ta ancra den e ley esta e articulo 13 di e Landsverordening Minimumlonen, caminda tin claramente stipula cu gobierno mester scucha (conseho di) SER prome cu bay over na ahusta/aumenta e salario minimo. Den e caso aki no a drenta ningun peticion pa conseho na SER di Minister di Labor tocante un ahustacion/aumento di e salario minimo entrante 1 di augustus 2017.

Den e Nota van Toelichting di e Landsbesluit caminda e ahustacion/aumento di e salario minimo a wordo regla, gobierno ta menciona cu SER a wordo scucha pa medio di e SER-advies “Aanpassing van het minimumloon per 1 januari 2017” di 2 december 2016. Sinembargo esaki no ta corecto, pasobra den e conseho menciona, SER a duna Minister di Labor un conseho ariba un posibel ahustacion/aumento di salario minimo specificamente y exclusivamente entrante 1 di januari 2017.

Manera ta usual den fin di aña, ariba 9 di november 2016 SER a ricibi un peticion di Minister di Labor (fecha dia 1 di november 2016) pa un conseho ariba un posibel ahustacion/aumento di e salario minimo entrante 1 di januari 2017. SER basando su mes ariba articulo 13 inciso 1 y 2 di e Landsverordening Minimumlonen, pero tambe ariba e posibel uso di inciso 3 (aunke gobierno no a duna “bijzondere omstandigheden” conforme e inciso aki den su peticion na SER di 12 di november 2016, locual si e la duna awor den e Nota van Toelichting) y evaluando esaki cu su investigacion y analisis di e desaroyo y expectativa di (crecemento) economico relevante na y pa Aruba, a duna un conseho negativo tocante un ahustacion/aumento di e salario minimo entrante 1 di januari 2017.

Por lo pronto SER ta mantene su posicion inicial encuanto e ahustacion/aumento di salario minimo tanten cu e no ricibi un peticion oficial di Minister di Labor. Si esaki sosode SER lo duna un conseho basa ariba e situacion social economico actual.

Mirando cu SER ta di opinion cu e proceso di ahustacion/aumento di salario minimo entrante 1 di augustus 2017, no a bay segun ley, pasobra gobierno no a scucha (conseho di) SER prome cu a bay over na dicho ahustacion/aumento, SER tin duda ariba e sostenibilidad di esaki.

SER a informa Minister di Labor como tambe Gobernador tocante e situacion aki, mirando cu esaki ta causante di preocupacion y incertidumbre grandi den nos comunidad.