Plasterk : Continuacion supervision financiero pa Aruba ta na ordo

ORANJESTAD – Un continuacion di supervision financiero pa Aruba ta na ordo y e mandatario Hulandes encarga cu Relacionnan di Reino Ronald Plasterk y/of su sucesor lo no tin obhecion pa esaki. Asina Plasterk a confirma pa NoticiaCla ayera tardi. E mandatario tabata na Aruba pa 24 ora den su bishita di despedida di Caribe Hulandes. “Den un combersacion recien cu minister di Finanzas (Angel Bermudez), ela bisami cu mester continua cu un forma di supervision financiero, sea extendiendo esun actual of un otro tipo (di supervision financiero)” Plasterk a sigui bisa. “Pa cuanto tempo y den ki forma, ta keda pendiente” e mandatario a sigui bisa. E pregunta a bin a base di declaracion di e presidente saliente di e colegio di supervision financiero, CAft esta Age Bakker cu a retira na juli ultimo. Segun Bakker, e ta kere cu mester simplemente haci e supervision di CAFT uno permanente.

FORMA ACTUAL OF NO

E mandatario a bisa cu e mes no a tende obhecion personalmente of for di Aruba su banda contra algo e supervision actual of algo cu ta parce. “Mi por imaginami, pero esey ta den futuro” e mandatario a bisa, indicando cu aworaki ta dificil pa bin cu un contesta mirando cu Aruba ta dilanti un eleccion, y Hulanda ainda ta den pleno formacion di un gabinete nobo, pues e desicionan ey mester cay posiblemente e ora ey. Pues declaracionnan actual no ta mucho prudente. “Pero basa riba e experiencia te awor, lo ta bon pa continua cu e supervision financiero den un of otro forma”, e mandatario a finalisa bisando. Scucha e entrevista AKI.