‘Desorden planifica’ a mancha ultimo debate politico di KVK

ORANJESTAD – ‘Desorden planifica’ ta loke hopi cu a bishita e debate final di Camara di Comercio, a cualifica e evento. No pa motibo di Camara di Comercio mes, sino pa un grupo hoben di simpatisantenan di e partido berde AVP, cu a dicidi na final pa desobedece orden y crea un tipo di ‘desorden’ na final. “Mi ta desapunta cu nan no a respeta nos reglanan” presidente di KvK, Ernst Mohammed a bisa NoticiaCla na final refiriendo na e grupo aki. E formato diferente di e debate riba su mes tabata dinamico, aunke cierto momento complica, pero sigur diferente cu e prome debate teni na juni ultimo.

COMPLICA

E set up di e debate tabata diferente den sentido cu e biaha aki no ta solamente e lidernan politico a haya chens pa debati, sino cu varios di e integrantenan di partido, dependiendo nan experticio, a haya chens pa profila nan mes. Mes momento, a cuestiona cierto partido cu no a manda nan ‘experto’ riba cierto tereno pa debati e ‘experticio’ ey. Un situacion complica tabata e.o. e parti unda cu partidonan a manda pregunta pa otro, pero cu no a cana necesariamente manera planea. Por ehempel, tabatin pregunta dirigi pa cierto persona pero cu otro persona a haya nan mes confronta cu ne. E propio moderador Ruben Trapenberg a haya cierto parti dificil. “E lidernan politico a comporta nan mes, pero e publico a bin cu mal intencion. Mi no kier generalisa tampoco, pero tabatin un grupo dentro di un grupo” Trapenberg a bisa refiriendo na un grupo di hobennan di e partido berde cu na final no a contene nan mes, y a te hasta saca banderin nan cu nan no tabata permiti pa tin como parti di e reglanan. Trapenberg practicamente henter anochi a pasa ta hala atencion di e grupo y na varios occasion a pone cu varios persona di e publico a wordo ‘expulsa’ for di e sala. “Si ta ami tabata encarga cu e seguridad, mi lo a saca henter e grupo afo” Trapenberg a bisa. E ta considera esnan riba escenario exitoso, pero no esnan den publico. Trapenberg a acepta cu cierto parti tabata complica. E mes personalmente a confronta problema cu e parti di medico. Pero na tur, ela sa di haci un tremendo trabou, bou di circumstancianan hopi dificil.

E EVENTO MES

E evento mes tabata largo, varia pero cu un aceptacion regular di parti di esnan cu a presenta esaki y tambe esnan cu a sigui esaki via television. Algun lider politico cu ken e portal aki a papia, tabata satisfecho cu nan presentacion, pero tambe tur a critica e parti final unda cu e grupo di partido berde a dicidi di causa un ‘disturbio organisa’. Loke tabata positivo ta e hecho cu no laga solamente e lidernan presenta, pero tambe varios candidato dependiendo nan experticio, aunke cu aki tambe a cuestiona algun partido cu no a manda nan ‘experto’ riba tereno.

EN GENERAL

Camara di Comercio tabata poco decepciona di e resultado, sigur e parti final, unda cu e parti final a causa un desorden total, cu a laga un mancha scur riba henter e anochi. “Nos a traha hopi duro pa e evento aki, pa un grupo bin daña esaki” Sonia Velthuizen, directora di KvK a bisa NoticiaCla. Compara cu e prome debate, e tabata sigur uno mucho mas amplio y diverso. Si no tabata pa e disturbio ‘organisa’, e evento lo por a wordo cataloga como un exito cu e meta pa yuda e votador dicidi pa ken e tin cu vota den e proximo eleccion. Keda pendiente pa un compilacion di e debate mes.