De Meza: Hotel banda di aeropuerto lo ta cla september 2018

ORANJESTAD - Pa september 2018, e proyecto hotelero banda di aeropuerto balora na casi 35 miyon dollar esta Hyatt Place lo ta completamente cla. Asina e mandatario di turismo Mike de Meza a tende durante su recorido recientemente. Esunnan cu lo haci uzo di esakinan lo ta e turistanan, kendenan lo keda pa un par di ora na Aruba of pa 1 dia. Lo bay tin suficiente comercio den e area aki di cual lo haci banda di aeropuerto uno atractivo. Pero tambe localnan por haci uzo di dje. Segun indica lo bay tin servicionan di banco, servicio di companianan di seguro y otro tipo di comercio cual lo ta algo sumamente bon. 

HOTEL ‘BERDE’

E hotel aki lo bira completamente berde, pasobra tur aparatonan electrico cu lo uza, lo bay tin e clasificacion di mas halto den e industria di e sector energia. E sector aki ta label e aparatonan hopi berde di cual lo cumpli cu diferente rekisito cu por considera cu e ekiponan lo ta hopi eficiente. 

ATRACTIVO

Pa loke ta e parti di e hardin lo ta bunita, tambe lo tin restaurantnan y otro tipo di comercio. Esaki lo haci e area uno hopi atractivo y e ta keda cerca di e Green Corridor, Minister de Meza a expresa. E Green Corridor cu ta cuminsa desde aeropuerto te cu San Nicolas y esaki lo duna e area un otro dimension.

TRAHADONAN

A inverti hopi placa den e proyecto aki di cual ta un inversion di y esaki lo contribui na e economia di Aruba. E gerente di Hyatt Place a bisa Minister de Meza cu mas di 95% di e empleadonan cu lo traha eynan, ta hendenan local, esta Arubiano. Un porcentahe chikito lo ta esunnan cu lo mester yega eynan cu cierto experticio di pafo, pero no pa termino largo. 

Pa cu e parti di empleadonan den construccion, a haci uzo di mayoria hende local. Mirando tur e puntonan aki, esaki ta pone cu ta bisa esaki ta tipo di proyecto cu ta desea di tin pa Aruba. Pasobra desde inicio di e proyecto y comienso di construccion por mira cu hopi hende local ta trahando den esaki.