Plasterk: Aruba no ta cla pa fia placa cu interes abou

ORANJESTAD – Ainda Aruba no ta cla pa fia placa riba mercado internacional cu interes abou. Awe durante e ultimo bishita di minister Hulandes di asuntonan di Reino Ronald Plasterk, ela bolbe bisa Noticiacla esey. Awe el a practicamente ripiti e mesun palabranan. E disponibilidad pa yuda Aruba t'ey di mes, pero e ta condiciona riba e conseho di CAFT. “Esey ta nifica cu prome e quota di debe mester baha, prome cu realmente por tin un bon motibo pa (Aruba) bin na remarke pa un inscripcion pa interes abou Hulandes (riba mercado financiero internacional).”  E mandatario tabata na Aruba pa un dia como parti di su tour di despedida den Caribe Hulandes.

TEMPO

E mandatario a bisa e portal aki cu e ta spera cu enberdad Aruba por logra e meta aki a termino corto, aunke cu e la spera di por a experiencia esaki den e gabinete (Hulandes) aki caba. A splica cu si Aruba logra esaki, e peso di e interes ta baha, cu ta pone cu consecuentemente e presupuesto ta baha mas ainda. “Prome mester bin un conseho positivo di CAFT cu e ta e momento pa haci esey” Plasterk a bisa, aunke cu no tin un fecha of un termino mara na dje pa logra esaki. “Gobierno (di Reino) ta warda riba e conseho di CAFT, CAFT ta tene e control pa loke ta e finanzas publico, incluyendo e quota di debe di (pais Aruba). Y asina cu tin un señal positivo, cu por cuminsa cu e proceso pa Aruba por bin na remarke (pa e inscripcion pa prestamo cu interes abou). Esaki ta parti di e acuerdo di diahuebs santo di algun aña atras, unda cu Hulanda a priminti di haci tal, pero cu lamentablemente no a materialisa ainda. Aruba di su banda varios biaha a keha esaki y cada bes ta cuestiona kico mas mester sosode pa Hulanda finalmente cumpli cu nan palabra, argumentando cu Aruba a cumpli. Hulanda sinembargo, manera awe por a tende, ta sigui pensa cu ainda Aruba no ta asina leu. Scucha e entrevista AKI.