AIB: A inverti mas di 1 miyon florin na renobacion di monumento

ORANJESTAD – AIB a inverti mas di 1 miyon florin na renobacion di monumento. Asina e instituto financiero ta raporta den un comunicado recientemente. Nan a celebra cu e contratista Aguirre Garcia & Sons a yega e punto mas halto di construccion durante renobacion di e edificio situa den Zuidstraat, net patras di e edificio actual di AIB Bank den Wilhelminastraat. "Nos tabatin hopi opcion, pero a scoge esun mas cu ta pas cu nos balornan como banco. Cu esaki nos ta subraya nos compromiso serio como un bon ciudadano corporativo, di ta inverti nos placa bek den nos economia y mes momento rescata un monumento", asina Frendsel Giel, Director di AIB Bank N.V. a duna di conoce.

"Pa nos ta importante sigui inverti den e economia cu tanto ta sostene nos y ta confia nos cu proyectonan grandi. Ultimo añanan nos a facilita fiansanan grandi pa Aruba, manera ta Hospital, proyectonan di Green Corridor, Watty Vos Boulevard, proyectonan di SOGA y FDA por ehempel addicional na e projectonan di sector priva. Ta e mesun confiansa cu nos ta haya di comercio, e mesun confiansa nos ta demostra bek dor di inverti den nos mesun economia", di acuerdo cu Frendsel Giel.

Pa loke ta infrastructura di e banco, den pasado caba a inverti den cumpra e parkeerplaats cu tabata di santo y cu un luga pa laba auto. A traha un bunita cura rond di dje, y asina combirti'e den un parkeerplaats pa empleadonan di e banco, embeyeciendo Wilhelminastraat. Cu e adkisicion di e edificio den Zuidstraat, pega tras di e edificio di AIB Bank, lo crea henter un blok di Wilhelminastraat te Zuidstraat, bunita drecha y manteni. Ta nan intencion pa pone poco klinkers tambe den e area di e banco den Zuidstraat.

Si tur cos bay segun plan, lo entrega e proyecto na fin di e prome kwartaal di 2018, aunke cu te awor e trabounan ta mustrando bastante adelanta. "Cu sosten y confiansa di comercio, nos lo sigui crece y lo sigui inverti den nos mesun economia, manera ta conservacion di e monumento aki. Nos ta masha orguyoso di por duna di nos banda pa sigui embeyece e area aki", asina Frendsel Giel a termina bisando.