Dave Holloway ta bisa cu tin prueba cu por resolve caso di su yiu

NEW YORK/ORANJESTAD – Loke mester ta prueba nobo den e caso di desaparicion di Natalee Holloway 12 aña pasa, ta motibo pa bolbe trece e noticia (bieu) dilanti e siman aki. E pruebanan ta restonan loke mester ta un ser humano, cu posiblemente ta di e dama perdi. Sinembargo informacion cu NoticiaCla tin confirma, ta cu ta trata di un bestia y no un ser humano. Sinembargo, riba e canal di television NBC awe mainta durante e programa The Today Show, e tata Dave Holloway, ta sigura cu ta restonan di un ser humano. E caso di desaparicion di Natalee Holloway a sosode na mei di 2005 y cada bes ta bin mas informacion cu ta tene e storia aki bibo. 

PROGRAMA DI TELEVISION

Na vispera di un serie di 7 programa cu ta cuminsa diasabra awor riba e canal mericano Oxygen, e tata di Holloway, Dave, tabata den e programa Today Show di NBC awe mainta, cu informacion cu prueba nobo a conduci nan na bin cu e informacion aki den un forma di programa. Hunto cu un investigador priva, T.J. Ward, nan a splica e presentador di e programa bon mira, Matt Lauer di The Today Show, cu pa 18 luna nan a bin ta conduci un investigacion ‘undercover’, cu a trece nan Aruba. Aki, cu ayudo di un amigo di Joran vd Sloot (cu ta sospechoso principal den desaparicion di Natalee Holloway), a hiba nan na un sitio unda cu a bin haya restonan di loke a parse resto humano. Segun Holloway, nan a haya siguransa  cu ta trata di resto humano, cu a keda entrega na nan despues. Aworaki nan ta den e proceso pa haci investigacion forensico pa determina a base di DNA si esaki enberdad ta Natalee Holloway. Lauer a confronta Holloway cu e pregunta cu si no ta mucho coincidencia cu net awo ta bin cu esaki pa propaga un serie riba e caso. “Wak, ne momentonan aki no ta importa si tin camera of no. Ora cu nos a cuminsa, e hendenan di Oxygen a acerca nos y a sigui nos (pa Aruba). Nos no tabatin obhecion. Pero mester bisa si, cu si no ta pa e camaranan cu a filma tur cos, nos lo no ta unda nos ta awor” Holloway a bisa Lauer. No ta conoci kico e kiermen cu esaki.

ARUBA

NoticiaCla a acerca autoridadnan riba e tema aki recientemente y a compronde cu no por bisa mucho pasobra a firma un declaracion di confidencialidad, ya cu a entrevista e autoridadnan aki tambe. Y como parti di e acuerdo, mester a firma e acuerdo aki. Pero despues e portal aki a compronde cu e restonan cu Holloway ta papia di dje, ta restonan di un bestia, posiblemente un cacho, y no un ser humano. “E informacion cu nan ta presentando, ta incorecto” e fuente a bisa e portal aki. Fotonan ta cortesia di NBC NEWS, Today Show.