Fundacion Watty Vos ta recorda fecha di natalicio Watty Vos

ORANJESTAD - 80 aña pasa, pa ser exacto 16 di augustus 1937, na Weststraat 16 den Rancho e bario di piscadornan di Playa, a mira luz di dia sr. Edgar Joaquin Vos mihor conoci como Watty. Su persona tabata e di cuatro for di cinco yiu di e pareha Salomon y Genoveva Vos-Tromp. Como studiante Watty a bay St. Dominicus College na cual scol ela haña su MULO- diploma, tambe e tabata tin diploma di adjunct- commies y abogado. Ela casa cu Tibisay Ureña di cual union a nace 2 yiu, Edgar y Sally. 

DEPORTE

Watty tabata un ex internacional di Aruba y Antillas Hulandes den e ramo di futbol. Como miembro di seleccion di futbol di Antillas a logra na Cuba medaya di plata despues di Costa Rica.

MUSICA,SOCIAL y SINDICALISMO

Watty tambe a sa di gosa di fama como musico durante e temporada como integrante den e conhunto Los Duques cual conhunto a sa di gosa di un popularidad enorme na Aruba cual a pone tambe cu nan wordo contrata pa e inauguracion di Aruba Caribbean Hotel.

EMPLEADO PUBLICO Y ABOGADO

Watty pa varios aña a cubri e posicion di sub- hefe di e departamento di Domeinbeheer. Su persona a fungi activamente como abogado durante e periodo 1989 pa 1994 trahando hunto cu e oficina Gonzalez, Zielinski y Gibbs, aunque cu ya desde 1970 el a worde acepta como miembro di Bali y ela huramenta como tal.

POLITICA

Watty ta co- fundador di partido MEP, fundador di partido RUBA, cual despues na 1982 a uni forsa cu partido AVP, partido cu Watty a keda miembro te cu su fecha di fayecimento. Watty a haci su debut den politica na aña 1971 ora cu su persona hunto cu sr. Betico Croes (q.e.p.d.), sr. Daniel Leo (q.e.p.d.) y sr. Efrem de Kort a funda partido MEP. Desde su debut den politica y te na eleccion di 1997 cual porcierto tabata e ultimo eleccion cu Watty a participa, semper el a worde escogi cu votonan preferencial.

Durante su carera den politica Watty a ocupa e siguiente puestonan; 1971- 1973 miembro di eilandsraad, december 1973- december 1975 minister di husticia y vice premier di Antillas Hulandes den gabinete Evertsz, mei 1976- februari 1977 diputado y alaves miembro di eilandsraad, 1977- 1985 miembro di eilandsraad, 1 januari 1986- februari 1989 minister di husticia di Aruba den gabinete Eman I, februari 1989- september 1994 miembro di Staten, 1 september 1994- 6 januari 2001 minister di husticia y obras publico di Aruba den gabinetenan Eman II y III.