Desviacion di trafico entre rotonde di airport y Mahuma

ORANJESTAD – For di awe mainta 9’or, automobilistanan por a nota un desviacion di trafico na altura di aeropuerto. Departamento di Obra Publico (DOW) a informa pueblo di Aruba en general y specialmente automobilistanan cu ta haci uzo di e caminda principal for di Spiraal rotonde pa rotonde di Mahuma cu entrante awe 16 di augustus 2017 pa 9’or di mainta tin un desviacion di trafico.

E desviacion ta encera cu e trafico di ambos direccion lo mester pasa awor riba e caminda nobo cu a ser construi, esaki pa motibo cu lo bay renoba e caretera existente. E trabounan lo tin un duracion di 4 siman.

Habitante/automobilistanan cu mester yega Simon Antonio/Kas Paloma lo mester pasa via rotonde di Mahuma direccion Parkietenbos pa asina yega na e barionan menciona y na mesun momento e caminda di Mahuma 52 pa Mahuma 54 lo wordo cambia temporalmente pa trafico di ambos direccion pa por yega nan hogar.

En coneccion cu e trabounan menciona Departamento di Obra Publico ta haci un peticion na tur automobilistanan pa tene cuenta cu a cambionan den trafico y ta pidi pa tene cuenta cu e inconveniencianan. DOW ta gradici pa e comprencion y bon cooperacion.