Durante entradanan hudicial caso ‘Avior’ a confisca 1 miyon florin cash

WILLEMSTAD - Diamars mainta a tene 6 entrada hudicial na Corsou ehecuta pa Recherche Samenwerkings Team (RST)y den cooperacion cu unidad di Defensa, polis di Corsou (KPC), Afpakteam, Koninklijke Marechaussee y polis di Aruba (KPA) cu a bay cu nan cachonan cu ta detecta placa. Esaki den cuadro di investigacion “Avior”. E entradanan hudicial ta den diferente cas, minimarket y empresa.

Pareu cu na Corsou ta tene tambe entrada hudicial den un minimarket y un cas na Rotterdam, Hulanda. Esaki ehecuta pa autoridadnan Hulandes. E entradanan hudicial ta den presencia di un Hues-comisario y Fiscal di Ministerio Publico (OM). Durante e entradanan hudicial a detene e homber W.S.C. E ta ser sospecha di labamento di placa y ofrece servicio bancario subteraneo (ondergronds bankieren).

Durante e entradanan hudicial a confisca parti di administracion, tanto hardcopy como digital. Esaki pa mas investigacion. Tambe a confisca un suma grandi di placa cash, totalisando 1 miyon florin. Varios auto entre nan un Porshe Cayenne, RAV4, Toyota Corolla, Jeep Cherokee, prenda, varios edificio cu un balor total cu ta surpasa 10 miyon florin. Fiscal di Ministerio Publico Corsou no ta exclui mas detencion y/of mas entrada hudicial den e caso aki.