Competencia windsurf na Islas Canarias favorabel pa Sarah-Quita

Posted on 08/15/2017 11:41 am AST | Updated on 08/15/2017 8:51 pm AST

STA. CRUZ DI TENERIFE - Na e archipielago di Islas Canarias cu ta un total di 7 isla e ultimo competencia a tuma lugar. Desde comienso di Juni Sarah-Quita ta biaha pa Gran Canaria unda e ta continua cu su entrenamento den e disciplina di Ola y Freestyle pa ta bon prepara pa e 6 siman di competencia. E promer competencia na Pozo Izquierdo, Gran Canaria ta den e disciplina Ola. E resultado no tabata loke Sarah-Quita a spera. Aki e ta keda na di 5 lugar. E siguiente competencia den freestyle ta na Fuerteventura unda e biento tabata nuclear ta supla entre 35 pa 40 nudo. E tension y presion cu Sarah-Quita mester a soporta tabata nunca bisto. E lucha tabata pa mantene su record di no a perde ningun manga ni evento desde 2008. E evento tawata decisivo unda e demanda mental, emocional tawata grandi. Sinembargo Sarah-Quita ta logra gana y captura su di diez titulo mundial sigui den freestyle. Pa termina e trayecto di Islas Canarias ta sigui pa Sta. Cruz di Tenerife unda na el Medano e competencia den ola ta continua. Dos eliminacion ta ser realiza. Den e promer eliminacion Sarah-Quita ta elimina manera pacman tur su contrincantenan cu e ta topa ariba su caminda pa finalmente enfrenta Daida den semi-final. Lastimamente Daida door di un salto ta lesion su mes durante e penultimo manga y no por nabega mas. Di e manera aki SQ ta hanja su mes na posicion #1. E condicion di olanan y biento ta varia enormemente cu ta causa cu mester cambia e tamanjo di vela continuamente. Den e Segundo eliminacion e biaha aki Sarah-Quita ta enfrenta e otro morocho cu ta Iballa Moreno cu su dia anterior el a bati. Iballa ta ariba un mision pa defende su propio titulo y di su ruman Daida. Tanto Sarah-Quita como Iballa ta bataya duro durante 16 minuut y Iballa to logra gana e manga. Apesar cu Iballa a gana e tin cu bati Sarah-Quita 2 biaha cu ta bira un super final. Iballa ta logra y ta bira e ganador di e evento na Tenerife y Sarah-Quita ta bira di dos y e unico regatista tanto den categoria masculino y femenino cu no ta procedente di Spaña ariba podium. Cu e resultado aki Sarah-Quita ariba ranking mundial den e disciplina ola ta na #3 lugar y den disciplina di slalom na #1 y den freestyle e ta campeon mundial pa di 10 biaha. Pa awor aki e tin 13 titulo mundial acumula ariba su nomber.  

  • Arubiano Denzel Dumfries ta firma cu PSV pa 5.5 miyon euro

    Arubiano Denzel Dumfries ta firma cu PSV pa 5.5 miyon euro

    EINDHOVEN - Ex seleccionado di Aruba, Denzel Dumfries a bay e gigantenan di PSV pa un suma di 5,5 miyon euro te cu 2023. Ya caba e la pasa su control medico. Denzel a hunga e ultimo temporada cu SC Heerenveen. Potret cortesia PSV

  • Prome transmision di futbol Rusia 2018 a cuminsa awe na SETAR Sero Blanco

    Prome transmision di futbol Rusia 2018 a cuminsa awe na SETAR Sero Blanco

    ORANJESTAD - Awe mainta tempran Telearuba a transmiti FIFA Copa Mundial Rusia 2018 ta “live” na oficina di SETAR na Seroe Blanco. E weganan ta andando te cu e ultimo wega awe tardi Portugal Spaña. Amantenan di Futbol Mundial Russia por sigui SETAR su Facebook pa mas informacion. E proximo transmisionnan LIVE na SETAR Sero Blanco lo ta dianan 22 y 28 di juni 2018 y dia 11 di juli cu e weganan semifinal. SETAR ta recorda tur hende riba e campaña di Russia 2018 special pa tur cliente di SETAR Complete ta participa pa gana un SmartTV. Durante e transmision diahuebs dia 28 di juni lo anuncia e 3 ganadornan. Si ta desea di sa mas di SETAR Complete por tuma contacto na telefon 525-1702.

  • Prome wega di FIFA World Cup 2018 presenta den gran forma

    Prome wega di FIFA World Cup 2018 presenta den gran forma

    ORANJESTAD - Diahuebs mainta a inicia FIFA World Cup 2018 y Telearuba a transmiti en BIBO e prome wega entre Rusia y Saudi Arabia for di e cantina di Aruba Bank. Tanto Aruba Bank como tambe Telearuba ta masha contento di por a trece e prome wega pa pueblo di Aruba via television y cu naracion na papiamento.

  • SETAR cu transmision na SETAR Seroe Blanco pa Rusia 2018

    SETAR cu transmision na SETAR Seroe Blanco pa Rusia 2018

    ORANJESTAD - SETAR, como sponsor principal di FIFA Copa Mundial Rusia 2018, ta invita un y tur pa bishita SETAR Seroe Blanco durante e transmision di Telearuba diabierna dia 15 di juni y 22 di juni 2018 cuminsando for di 8’or di mainta en adelante. Tambe diahuebs dia 28 di juni for di 10’or di mainta y diaranson dia 11 di juli pa 2’or di merdia.

  • Aruba Growth Fund su miembronan a participa den KLM Aruba Marathon

    Aruba Growth Fund su miembronan a participa den KLM Aruba Marathon

    ORANJESTAD – E grupo mas grandi dentro di e prome edicion di KLM Marathon, diadomingo mainta 3 di juni, cu comienzo y final na Palm Beach, a pertenece na e grupo di Aruba Growth Fund. E grupo a consisti di 170 colega, cu a participa den tur categoria y a logra resultado impresionante.

  • Joel Kuiperi ta gana Plata den XI Juegos Suramericanos na Cochabamba 2018

    Joel Kuiperi ta gana Plata den XI Juegos Suramericanos na Cochabamba 2018

    COCHABAMBA - Den e di XI Juegos Suramericanos cu a wordo teni den e ciudad di Cochabamba, Bolivia e atleta Joel Kuiperi ta marca historia den e deporte di weightlifting ta logra gana medaya di Plata pa pais Aruba. Joel cu a bai bon prepara a hisa den categoria di mas di 105kg mester a bataya duro contra e atleta di Argentina pa logra gana e medaya di Plata aki. Den su hisadanan Joel ta logra den snatch 144kg, clean & jerk 175kg pa un total di 319kg. cu e hisadanan aki Joel ta logra kibra 3 record di Aruba cu tabata riba su propio nomber. Den snatch cu 1 kg, clean & jerk cu 5kg y Joel su mihor total den competencia internacional tabata 310kg y na Cochabamba 2018 ta total 319kg. Ganador den e categoria di mas di 105kg, medaya di Oro a bai pa e atleta di Ecuador Anderson Calero cu 365kg, Medaya di Plata Joel Kuiperi di Aruba cu 319kg y medaya di Brons pa Alejo Solito di Argentina cu 318kg.

  • Powered by SETAR