Conocido musico y docente Tommy Croes a bay sosega

ORANJESTAD – Diadomingo merdia NoticiaCla a haya confirma pa su ruman homber Rudy, cu conocido musico y docente Tommy Croes a fayece na Colombia despues di varios dia di ta den cuido intensivo. Mesora ora cu e noticia a plama riba rednan social, esaki a keda inunda pa mensahenan di consuelo pa e famia.

E ANUNCIO

Oficialmente e mensahe a drenta pa e portal aki 15 minuut despues cu Tommy a bay sosega, cu tabata 1:03 pm. “Papa Dios a tum'e den su reino awe” tabata e mensahe cortico, pero conmovedor.

MUSICO Y DOCENTE

Tommy tabata conoci pa a milita den e banda Cryptus Confessions, pero mas ainda pa su voz special den ‘Grupo di Betico’. Tambe Tommy tabata docente pa hopi aña unda cu e tabata duna les di e.o. musica. Hopi di su ex alumnonan a comparti nan momentonan bunita riba e.o. Facebook. Pa varios dia caba familiarnan tabata pidi pa resa p'e, pasobra su situacion tabata bayendo mas malo y te hasta a haya Santa olio dado momento.

GRUPO DI BETICO

”E VOZ di nos musica tradicional a bay sosega awe merdia. Mo Tommy, nos ta hopi agradecido na bo cu bo a brinda nos bo tremendo Voz. Un Voz cu Tata Todopoderoso a regala bo, pero bo a comparti esaki cu bo Pueblo y cu hopi den exterior. Nos lo haya bo falta hopi mes.Until we meet again mo Tommy ” tabata e mensahe di Grupo di Betico, e grupo den cual Tommy a milita te na ultimo. NoticiaCla ta manda palabra di forsa na famianan di Tommy, y cu Tommy sosega na paz.