Dos Arubiano deteni na Miami pa a trafica droga

MIAMI – Dos Arubiano (tata y yiu) ta deteni na Miami for di siman pasa diamars pa traficacion di droga, specificamente cocaina. Ta trata di e hombernan A.Croes (69) y J. Croes (31). E noticia mes a plama diadomingo, y a haya un tinte politico mesora ora cu a bira conoci cu nan ta familianan di campañadonan di partido geel esta MEP. Mesora lider di e partido heel Evelyn Wever Croes a reacciona, confirmando cu ta trata di familiarnan di campañadonan di MEP, pero cu e personanan deteni mes, no tin nada di haber cu e partido.

DETENCION

Oficialmente e informacion di for di Miami ta bisa cu nan a cay cera diamars y cu nan a keda registra na un di e prisonnan di Miami pa 2:44 pm, y cu ta sospecha nan di trafica 470 gram di cocaina y cu nan lo tin cu paga un fiansa pa haya nan libertad condicional. Riba nan informacion ta haci mencion di aresto domicilio.

REACCION DI MEP

Algun rato cu e noticia a plama, y cu ela haya un ‘tinte politico’, lider di MEP Evelyn Wever a reacciona brevemente y a manda e siguiente reaccion pa NoticiaCla :”Poco tempo pasa, na momento cu e minister di labor di AVP a wordo interoga pa corupcion y labamento di placa, mi a bisa cu esun cu comete algo malo, mester carga su responsabilidad. Mi ta ripiti esaki tur dia y tur caminda. Tambe awor cu dos ciudadano di Aruba, familiar di nos campañadornan, a wordo deteni na Merca, e opinion aki ta aplicabel y valido. Mi ta enfatisa cu e ta cay pa nan responsabilidad y cu e no tin vinculo algun cu nos campaña di nos prestigioso partido. MEP ta creciendo cada dia y lo sigui crece y no tin nada pa para nos”.

REACCION INTERNACIONAL

Interesante ta cu e forma con e noticia a keda plama, a yega te na Corsou, unda cu e informacion a wordo ‘bira’ y gespin den un otro direccion. NoticiaCla mes a haya varios yamada di varios medio di Corsou en busca di informacion riba e caso aki, puntrando pakico tin tanto atencion pa e caso aki. Ora cu a haya e mensahe cu tabata circula, a compronde pakico. E mensahe na Corsou tabata esaki” Boletin extra, Lider di kampaña di MEP, lider di kampaña di Evelin Wever Croes su ruman i tata detení na Merka pa trafikashon di kokaina na Miami Dade.” Tambe cu e lo tabata un golpi fuerte pa e lider di campaña, cu ta yiu di e persona deteni na Merca. Mas informacion for di lider di MEP a confirma pa e portal aki cu enberdad esnan deteni ta tata y ruman di e campañador, pero cu e no tin (mucho) contacto cu nan pa basta tempo. “No ta hendenan di MEP” Wever a sigura e portal aki, refiriendo na e dos personanan deteni.