Lotto a lansa su wega nobo 1-Off

ORANJESTAD – Lotto a lansa su wega nobo diabierna ultimo, yama ‘1-OFF’, cu ta lagabo gana algo hasta ora cu bo ta ‘uno off’. E wega ta cay den e famia di weganan di 4 cifra manera Catochi, Big-4 y Zodia. E lo tin su propio sorteo cu ta tuma lugar despues di saca numbernan di Big 4, durante e sorteo di anochi 9’or.

CHENS

E hungador tin 81 chens pa gana y e ta hopi facil. Bo ta scohe 4 number entre 0-9 y bo ta haci bo bet. Match 1234 y bo ta gana. Bo por cuminda e 1-OFF desde 50 cen pa mitar pida of 1 florin pa full un pida, te na un maximo di 50 florin. Cu cada 1 florin bo por gana 2500 florin, y si bo cumpra 50 florin y bo match e numbernan, bo por gana e premio maxio di 125 mil florin. E wega mes ta cuminsa dialuna awor.

1-OFF

Ta importante pa corda cu pa un persona por gana, bo numbernan mester ta den e mesun secuencia cu e numbernan cu a sali ganador durante e sorteo. Si bo tin 1-OFF (un mas of un menos) riba 1 di bo numbernan y bo a bet 1 florin, bo ta gana Afl. 100,-. Si bo tin 1-OFF riba 2 di bo numbernan y bo a bet 1 florin, bo ta gana Afl. 25,- Si bo tin 1-OFF riba 3 di bo numbernan y bo a inverti 1 florin, bo ta gana Afl. 15,- y si bo tin riba tur 4 di bo numbernan 1-OFF y bo a inverti 1 florin, bo ta gana Afl. 50,-. Mas bo inverti/bet/cumpra, mas bo ta gana.