Arends: Aumento di salario minimo tabata conoci

ORANJESTAD  – “E aumento di salario minimo (anuncia) tabata conoci” minister di economia Richard Arends a reacciona pa NoticiaCla diabierna. E ta bisa esaki particularmente pasobra segun e mandatario, esaki a keda anuncia for di december ultimo. Pero asuntonan legislativo no a keda cla y ta awor numa por a introduci e cambio. “Pero el a wordo anuncia e tempo ey (caba) y tambe menciona durante tratamento di presupuesto 2017” Arends a sigura e portal aki awe tardi. E mandatario a bisa e portal aki cu e lo topa tanto ATIA como KVK otro siman pa atende cu nan preocupacion y critica. “Pero mi kier reitera cu ta e mesun aumento di salario minimo anuncia na december”.

E ANUNCIO

Tabata e siman aki cu gobierno a haci e anuncio cu e suma di salario minimo pa un empleado cu tin 18 aña di edad of mas ta wordo ahusta entrante 1 di augustus 2017 na Awg. 1.711,15,- pa luna y Awg. 399,10 pa siman. Pa un empleado di 18 aña of mas cu ta haci trabou domestico den un residencia priva, e salario minimo ta bira Awg. 798,30 pa luna. Pa e empleado domestico cu ta traha 22 ora of menos pa siman, e suma di salario minimo lo bira Awg. 8,90 pa ora.

CRITICA DI GREMIONAN

E prome pa critica esaki, tabata ATIA. “ATIA ta protesta energicamente contra e “modus operandus” aki. No por ta asina cu den un democracia no tin luga mas pa dialogo y cu den corant comercio tin cu tuma nota di cambionan cu ta afecta nan, y cu netamente nan mester paga” tabata entre otro nan comentario den nan comunicado. KVK no a keda atras y nan tambe a emiti nan preocupacion diabierna. “E decision aki ta uno cu Camara di Comercio y Industria (KvK) ta haya cuestionabel mirando cu tin diferente aspecto cu no a tene cuenta cu ne prome cu yega na un decision di e magnitud aki y riba dje haci un anuncio mas di un siman despues cu e ahuste lo mester drenta na vigor” KVK a participa entre otro. Por haya ambos declaracion completo riba e portal aki. Pues otro siman e mandatario lo topa cu e gremionan aki.