Si Lotto por pone 20% pa Lotto, Catochi tambe mester por

ORANJESTAD – Parlamento tin den nan man pa cambia e ley di gaming, di tal forma cu tur hende lo paga nan ‘fair share’, esta tanto Catochi y Lotto. Asina minister di deporte Alex Schwengle a anuncia na ocasion di lansamento di un producto nobo di Lotto Aruba. “Si nos perde e oportunidad ey, nos tin cu puntra nos mes ki tipo di gobernante nos tin” e mandatario a bisa. Mes momento ela referi na varios tipo di wega di number cu ta ilegal y cu lotto tin cu ‘competi’ cu ne. Pero asina e ley cambia, e ta sigur cu lotto lo sigui crece y cu Catochi lo muri.

CATOCHI VS LOTTO

Lotto ta inverti 20% di su entrada total na deporte segun e mandatario. “Si esey ta haalbaar pa Lotto, mi ta haya cu esey mester ta haalbaar pa Catochi tambe. Esey ta mi opinion y mi no ta bay kita mi opinion y mi no ta bay doblega tampoco” e mandatario a sigui bisa. “Si Catochi bisa cu 20% di nan omzet bay pa deporte, no ta haalbaar, nan habri nan bukinan pa nos tira un bista cu berdad e no ta haalbaar”, Schwengle a sigui bisa, mandando un mensahe fuerte pa e grupo di wega di number aki.

E cambio di ley ta riba mesa, pero pega pa via di e discusion di Lotto via Catochi. E hecho cu Catochi ta bisa cu pone 20% pa deporte ta manda nan falliet, e ora mester mustra cifra. E ora e ta dispuesto pa sinta na mesa y wak si por baha e porcentahe.

LEY

Segun ley actual, ta un lotto tin. Pero tin hende ta bende otro tipo di lotto na Aruba tambe. Lotto Florida, Mega Million y mas. Tur ta ilegal segun e mandatario. E ‘mundo di Catochi’ a topa cu e minister di finansa, y ta conoci. E mandatario di deporte a sigura cu e no a topa cu nan na mesa. “Mi ta sinta cu nan na mesa na momento cu nan ta dispuesto pa habri nan buki. Na e momento cu bo habri bo buki, bo ta mustra cu bo ta un hende transparente y cu bo ta biba cu ley. Tanten cu nan no ta haci esey, ami no ta sinta cu ningun hende di Catochi”, Schwengle a bisa.