Entrega di vest na polis a bira polemica

ORANJESTAD – Entrega di un cantidad di vest na polis door di un instancia priva (den e caso aki e portal di noticia 24ora.com)un dia pasa, a bira henter un polemica un dia despues. Motibo di esaki ta cu e entrega di e vest na e.o. minister di husticia mes Arthur Dowers y un grupo di polis (riba potret cu e comunicado), a sosode sin conocemento di Alto Mando di polis, esta Dolfi Richardson. Mesora Richardson a emiti un comunicado, den cual e ta ‘gradici pa e gesto noble’ pero mes momento ta ‘rechasa’ e oferta aki.

COMUNICADO

Den e comunicado di un agencia di noticia, ta relata riba e entrega di e vestnan, como gradicimento pa e trabou cu ta haci. Y acompaña, tin varios potret unda cu ta mira cu minister di husticia mes ta ricibi un di e vestnan aki. Den un comunicado despues di parti di Richardson awe mainta, e ta mustra cu el ‘a tuma nota di un noticia/informe relaciona cu un cantidad di vest di seguridad cu lo a ser entrega na varios miembronan di Cuerpo Policial Aruba door di un agencia di noticia (den e caso aki 24ora.com). Como Korpschef di Polis mi no tabata na haltura di esaki” e hefe di polis ta sigui bisa. “E noticia aki a causa cierto reaccion for di varios ciudadano, pero principalmente di hopi miembro di polis mes. Como Korpschef di Polis, mi ta di opinion cu specialmente durante un temporada asina dificil manera den un aña di election politico nos como Cuerpo tin cu evita cu por tin duda den nos imparcialidad. Tambe importante den e comunicado ta mustra cu “E imparcialidad (di polis) no mag di wordo cuestiona ‘at all’ pa asina nos por sigui gosa di e confianza ey’. 

RECHASA E GESTO

Finalmente e hefe di polis a gradici sinceramente e gesto di solidaridad pa cu e Cuerpo pero ‘mester rechasa esaki respetuosamente pa no tin duda den nos obhevidad’. A haci mencion mesora cu polis mes tin un cargamento di vest na caminda.

POLEMICA

E asunto aki, a bira un polemica ora cu e noticia a plama y cu riba e.o. rednan social comentarionan a cuminsa plama riba e tema. Ela haya te hasta un tinte politico ora cu cierto politiconan a tuma e caso aki y a hinc'e den un bachi mas leu, indicando cu e acto aki te hasta ta uno castigable pa ley, ora cu un ambtenaar, incluyendo un minister, ricibi regalonan di comunidad. Esaki ta segun articulo 2:128 di nos codigo penal. E ta wordo considera como soborno. E asunto practicamente a bira topico di dia, tanto riba rednan social como algun radio emisora. Algun persona a comenta cu no ta compronde e 'issue', sigur si ta algo cu ta 'salba bida' of ta 'yuda' polis, nan mester ta mas cu welcome. Y cu den pasado tambe instancia a duna cosnan asina y no tabatin problema. Otronan ta bisa cu ta ley pa un y ley pa otro. Si no por duna un regalo aki, no por duna regalo otro caminda tambe.