Sindicatonan publico y priva ta cuestiona otro

ORANJESTAD –Den e gremio sindical tin problema actual riba cierto actuacion. Sigur entre esun publico y priva.  E grupo di sindicato SEPPA-SADA-SIMAR y SPA ta cuestiona actitud di colega sindicalista di ABV, Gina Maduro, y Maduro ta mustra cu cosnan no ta manera cu nan ta bisa. Segun e grupo prome aki, nan a tuma nota di e pensamento di e lider sindical Maduro cu ta cuminsa riba e hisamento di prijs di coriente, ta sigui riba empleadonan publico y ta termina riba un posicion conveniente di pasa Hospital bao di Utilities Holding. “Aunke nos ta haya cu e opinion ta mal bruha toch e tema di empleadonan publico ta hala nos atencion” e sindicatonan uni ta bisa.

“Sigur si tuma nota cu na final e mesun contenido di e relato ta saca e envidia grandi di e lider sindical aki y si e sindicato ABV tambe ta di mesun opinion mester lamenta mas ainda posicion di un organizacion cu ta di supone ta sali na defensa di derecho di trahador.” E grupo ta bisa.

Segun e grupo di sindicato, peor ora den pasado a conoce otro lidernan di ABV cu posicionnan mas coherente y pa e clase trahado. E grupo ta sigui bisa cu aunke no ta prome biaha, ya cu den pasado den discusionnan frente gobierno, ABV a posiciona su mes tambe contra loke sindicatonan den sector publico tabata cuestiona na gobierno.

” Pero tambe den henter nos experiencia cu Sra. Maduro e critica semper tabata riba e areglo di penshun di ambtenaar cu segun Sra. Maduro tabata un luho. Esaki pasobra Sra. Maduro of ABV ta compara nan mesun areglo di penshun cu ta malo versus esun di Ambtenaar”. “Cu tur sindicato ta sostene e pensamento cu e areglo di penshun ta malo ta berdad, pero e culpabel sigur no por wordo busca den seno di empleado publico of otro sindicato.” Segun e grupo, no ta un biaha, pero ta varios biaha SEPPA-SADA-SIMAR y SPA y tambe otro sindicato a trata di splica Sra. Maduro cu su atake e tin cu dirigie serca su dunador di trabao. Pa mas di e declaracion di e sindicatonan aki, lesa aki.

Reaccion di Gina Maduro.

Segun Maduro, como unico sindicato cu ta representa mayoria den sector priva i tambe e ta vocifera su mes pa tur e otro trahadornan cu no ta forma door di diferente motibo. “Of nan ta wordu intimida door di nan doño di trabou, of no tin e manera di paga un contribucion” Maduro ta sigui bisa. Segun Maduro, e 4 sindicatonan ta den nan confort zone. Basta nan tine bon. Nan LMA tin nan dobel proteha. I loke pasa aya banda no ta interesa nan. “Esaki ta e scheve groei cu a cuminsa di añanan largo y awor tin un gap asina grandi te cu bo tin 2 grupo di ciudadano” Maduro ta sigui bisa cu e isla ta dividi den e clase trahador.

“ Locual mi ta boga ta pa derecho i condicionnan parcial igual. I no uno ta biba den shelo y otro tin cu pasa trabou. Ta logico cu ora cualkier medida bin e ta dal tur e clase trahadornan. Pero e sapato lo primi esun cu no tin tur e privilegionan aki 10 biaha mas cu otro.”

Maduro ta sigui mustra cu e 4 sindicatonan aki ta haci cu ta a nan so a entrega. I eifo no a entrega nunca. “ Sector priva tambe a entrega no entre 2002 -2007. Pero tur e añanan a entrega y no ta recuperando nada bek. Pa mas di e declaracion di Maduro, lesa aki.