KVK: Di dos debate politico lo ta mas critico y dinamico

ORANJESTAD – Camara di Comercio (KVK) diahuebs atardi a extende su invitacion na su di dos y ultimo debate electoral pa 2017. E debate ey lo tuma luga dia 17 di augustus den e ballroom di Marriott Grand Ballroom cuminsando for di 7:00. Despues di e prome debate di KvK caminda a elabora riba diferente topico importante pa Aruba,nan ta sigura cu esun aki ‘lo ta mas critico y dinamico’. “ E debate ta brinda oportunidad na tur e partidonan politico cu ta bay eleccion dia 22 di september proximo pa por elabora y debati riba nan punto di bista pa goberna Aruba pa e siguiente 4 añanan nos dilanti”.

STRUCTURA DI DEBATE

E anochi di e debate lo inicia cu un palabra di bonbini duna door di e Presidente y e Vice-Presidente di Directiva di KvK. E moderador lo continua cu recapitula e reglanan di e debate y asina cuminsa e debate.

TRES PARTI

E debate lo consisti di tres parti. Lo tira lot pa saca e secuencia di turno di e partidonan na e tres seccionnan di e debate. Pa e prome parti di e debate ta invita tur e lidernan pa subi escenario segun secuencia di number y nan lo debati riba 3 diferente ponencia (stellingen) di relevancia pa comunidad di Aruba. E ponencianan lo wordo presenta door di e moderador kende lo introduci e ponencianan cu informacion adicional y di e forma aki splica e importancia di e ponencianan. Tur e lidernan lo ta na altura di e ponencia y tin cu indica si nan ta pro of contra di e ponencia presenta y ta haya e oportunidad pa elabora y debati e otro lidernan riba e ponencianan.

E segundo parti ta duna e lidernan oportunidad pa invita riba escenario e candidato di nan partido cu ta enfoca su campaña riba un topico specifico. Pa cada topico lo tin otro candidato/a. Tur e candidatonan lo haya oportunidad pa duna nan contesta riba e topico pa cua nan a wordo yama dilanti.Ta duna tambe tur e otro candidatonan oportunidad pa debati otro riba e topiconan cu ta wordo treci dilanti.

E tercer parti ta duna oportunidad pa e lidernan contesta preguntanan di publico y e pueblo di Aruba. Tur e lidernan ta haya e mes cantidad di tempo pa duna nan contesta riba e pregunta treci dilanti. Por ultimo tur ta haya oportunidad pa duna nan ultimo declaracion pa e anochi.

PARTICIPACION

Tur e lidernan politico a ricibi un invitacion personal pa e debate. Partidonan AVP y MEP no tabata rekeri apoyo pa nominacion y automaticamente ta participa na e debate. E otro partidonan cu logra colecta nan 578 firma pa por bai Eleccion 2017, lo por participa na e debate. Te cu awor POR, RED, RAIZ y PPA/UPP a logra y nan participacion na e debate ta garantiza. E otro partidonan tin te cu dia 15 di augustus pa logra esaki manera indica segun Conseho Supremo Electoral di Aruba.

REGLANAN DI CONDUCTA PA PUBLICO

E mesun reglanan di conducta di e prome debate ta conta pa e debate di dia 17 di augustus proximo:

-     No interumpi e debate

-     No stroba ni ofende otro persona vociferando opinion, propaganda o preferencia politico

-     No interumpi, stroba, descurasha ni ofende ningun lider politico

-     No discuti, grita, altera, ofende, discrimina ni ataca otro, etc.

No ta permiti pa trece material di promocion politico na e evento (incl. stickers, bandera, etc.). Ta importante pa publico tin un bon comportacion na tur momento y e reglanan di conducta lo wordo anuncia door di e moderador na comienso di e evento y si ta necesario lo wordo ripiti durante di e evento. Personanan cu mal conducta y cu no atene nan mes na e reglanan di conducta lo wordo atendi riba esaki door di e moderador verbalmente (1 advertencia). Si e persona no corigi e mal conducta, e lo wordo pidi pa bandona e sala di inmediato y lo wordo escolta door di siguridad pafo di e sala. E di dos debate lo tuma luga dia 17 di augustus den e ballroom di Marriott Grand Ballroom cuminsando for di 7:00 pm te cu 11:00 pm y lo ser transmiti tambe en bibo via Tele-Aruba. E dress code pa e anochi aki ta Business Suit. NOTA: Foto ta di archivo di NoticiaCla di e prome debate di KVK e aña aki dia 8 di juni ultimo.