Gouverneur: Duna asistencia riba laman ta birando mas dificil

ORANJESTAD – E trabou di Wardacosta ta birando mas dificil ora di duna asistencia pasobra no sa kico ta bay encontra ora cu duna asistencia of intercepta traficacion di e.o. hende. “Bo ta hayabo den cargamento di transporte di ilegal, tambe cu arma y droga” vocero di Warda Costa Roderick Gouverneur a bisa NoticiaCla e siman aki. Gouverneur ta staciona na Corsou, pero a bin Aruba pa duna publicidad na e trabou di Warda Costa. Ta aki a toca varios tema manera e trabou ‘trabahoso’ pa atende cu e combinacion di arma, droga y hende riba lama.

PAKICO MAS DIFICIL

E ta mas dificil segun Gouverneur, pasobra ora cu bo yega riba un boto, mayoria biaha ta bin den oranan di anochi. “Bo t'ey cu bo super (rhib) cu tin 5 of 6 hende riba dje” Gouverneur ta sigui splica. Bo ta topa un boto yen di hende y bo no sa si den e caso ey, ta un transporte di hende cu ta bin busca un miho bida, of ta hendenan cu ta trafica arma of droga. “Bo mester ta hopi cauteloso con bo ta yega na e boto aki. Bo mester zorg pa bo mesun seguridad tambe prome. Despues pa wak con bo ta haci e approach”.