Warda Costa: Situacion di Venezolanonan illegal riba boto ainda ta manehable

ORANJESTAD – Te na e momento aki, Wardacosta ta bisa cu e situacion di influx di Venezolano ilegal riba boto, ta manehabel. Asina vocero di Warda Costa, Roderick Gouverneur a bisa NoticiaCla. “Nos tambe a sigui e desaroyo na Venezuela di acerca hunto cu Marina Real. E parti di frontera ta cay bou di Reino Hulandes y nan tin un gran responsabilidad den e parti aki”. Pero Gouverneur ta admiti si cu e ta un situacion hopi dificil. E cantidad di Venezolano riba boto cu ta biniendo, ta manehabel, pero cu otro servicio acerca manera polis, douane y imigracion. “Pero si e situacion mester bira explosivo manera na Europa, e ta bira hopi dificil pa nos handle e”, e vocero a sigui bisa.

ESFUERSO

Intercepcion di ilegal ta rekeri hopi esfuerzo di Wardacosta. “Continuamente bo mester ta alerta. Continuamente nos ta poniendo unidadnan extra disponibel pa por combati esaki” vocero di Warda Costa Roderick Gouverneur a bisa NoticiaCla. Antes tabata subi lama, patruya op en neer mira si ta wak algo, of si algo ta pasa. No ta traha asina mas. Awor ta intercambia informacion cu varios partner, pa asina haci e trabou mas eficiente. “A base di informacion cu tin, bo ta actua”. Esey no ta nifica cu Wardacosta a stop di patruya, sino cu ta focus mas riba e ora cu bo sa cu algo por pasa.