Paul Croes a endorse de Meza y Visser como candidato

ORANJESTAD – Paul Croes awe nochi manera anticipa, a endorse coleganan di partido Mike de Meza y Richard Visser como candidato pa e proximo eleccion. De Meza pa su sosten incondicional den tempo bon y mas ainda den tempo malo. Visser pa su abilidad di pone un pueblo move den su tempo, y pa ta un candidato di districto di Noord, su debilidad. A bisa si, cu e ta presta ambos candidato su ‘team’, pero solamente pa 44 dia cu falta pa eleccion. Pasobra el a priminti di bin bek mas duro cu nunca. Mas prome den dia, e portal aki a informa caba cu tabata intencion di Croes pa endorse su colega(nan). A resulta finalmente cu ta dos colega el a endorse, na cas di su suegra Linchi Merryweather.

NO PARTICIPA

Motibo duna pa endorse dos colega y pa cual Croes no ta participa, ta e hecho cu ainda no tin claridad riba e caso cu e ta sospechoso di dje, esta caso Ibis. Como tal a opta pa hala atras, y asina duna espacio pa otronan sigui, y pa e no stroba e partido cu su caso. E unico persona relaciona directamente cu su oficina, Giovanni Capriles ainda ta deteni (a keda prolonga cu 60 dia recientemente) y otro personanan indirectamente involucra, tambe ta deteni ainda. E caso ta bou di investigacion keto bay, pero no tin mucho claridad, ni pa Croes of otronan.

.