Minister Paul Croes ta endorsa candidato pa eleccion awe nochi

ORANJESTAD – Minister Paul Croes ta anuncia awe nochi ken e ta endorsa como candidato pa e proximo eleccion di dia 22 di september. NoticiaCla a confirma cu e intencion ta pa den seno di su hendenan, e haci e anuncio aki. Mientras cu tin hopi rumor ken e lo endorsa, nada no ta conoci. Por lo menos no publicamente. Hecho ta cu e ta keda un candidato di AVP, y ta mas probabel un di su actual coleganan minister. E proceso di awe ta pa asina su seguidornan sa pa ken nan tin cu vota, awor cu oficialmente Croes no ta riba e lista y consecuentemente no ta participa na e proximo eleccion.

E CASO IBIS

Motibo duna pa cual Croes no ta participa, ta e hecho cu ainda no tin claridad riba e caso cu e ta sospechoso di dje, esta caso Ibis. Como tal a opta pa hala atras, y asina duna espacio pa otronan sigui, y pa e no stroba e partido cu su caso. E unico persona relaciona directamente cu su oficina, Giovanni Capriles ainda ta deteni (a keda prolonga cu 60 dia recientemente) y otro personanan indirectamente involucra, tambe ta deteni ainda. E caso ta bou di investigacion keto bay, pero no tin mucho claridad, ni pa Croes of otronan.