Evelyn Wever: Laga husticia cana su caminda den caso iregularidad naturalizacion

ORANJESTAD – “Ta importante pa duna husticia espacio pa haci su trabou y determina kico precies e caso ta”. Reaccion di lider di partido di oposicion MEP Evelyn Wever na NoticiaCla.com riba e asunto di supuesto iregularidad den un asunto di naturalizacion, y mas specifico den asunto di toetsing pa por haya pasaporte hulandes. “Mi a tuma nota di algun informacion circulando den cierto medionan di comunicacion referente un investigacion di posibel iregularidadnan den e proceso di naturalizacion” Wever a sigui bisa.

E caso ta referi na hendenan cu lo a haci nan mes culpabel na supuesto manipulacion cu e testnan cu ciudadanonan stranhero tin cu pasa pa por haya nan pasaporte hulandes. E persona(nan) lo tabata ‘konkel’ cu e resultado cu ta pone cu hendenan toch ta pasa esaki y haya nan pasaporte. E problema ta cu tin acusacionnan cu a cay ligando miembronan di e partido y famia den e asunto. Y aki ta unda cu e lider a bin dilanti, pa aclarea un ke otro pa e medio aki, aunke e ta abstene di duna mucho mas informacion. E lider di e partido a opta pa no menciona nomber, ya cu e no a haye prudente pa haci tal. Noticianan circulando, no confirma ta papia di un primo di Wever cu lo ta meti den e asunto aki.

“Mi ta lamenta cu cierto mediadonan ta condena ciudadanonan promer cu husticia a cana su caminda” Wever ta sigui bisa, refiriendo na e hecho cu ta haciendo mencion di nombernan liga na Wever. Mientras cu Wever no ta haci mencion di e persona ey, e ta mustra si, kico e ta pensa si un persona, liga of no na dje, comete algo supuesto illegal. “ Mi kier bisa enfaticamente cu ami Evelyn Wever-Croes como persona, lider politico y parlamentario ta pensa cu cada persona cu comete un eror mester carga su responsabilidad, pero prome Husticia mester por haci su tarea di acuerdo cu leynan vigente y mester conta pa tur ciudadano igual”

 Ora cu e noticia aki a plama den fin di siman, cu tin supuesto iregularidad tumando lugar den departamento di naturalizacion, specificamente e parti di proceso di pasaporte NoticiaCla.com a acerca tur partido envolvi. Pero esnan cu a reacciona, tabata Wever, mientras cu otronan ta pendiente un reaccion, y tin cu check cu nan hefenan prome cu nan por papia. E hecho ta hayando mas y mas atencion.