Mericano acusa di e bommelding recien na Aruba, ta bringa bek

WASHINGTON – E Mericano cu a keda deteni recientemente na Aruba, sospecha di ta esun cu a haci e ‘mal joke’ di un bommelding den un avion cu a yega Aruba dia 27 di juli ultimo, a bay prensa mericano pa protesta. Jennifer Jones, un docente na Washington a relata na prensa Mericano con e y su amiga Derna Dickson a keda deteni na Aruba pa mas di 24 ora despues di e loke a sosode na aeropuerto. “Mi tabata spanta. Ta e cos mas horendo cu a sosode cumi den mi bida”. “Nos a keda deteni den exterior” el a sigui bisa. E ta conta cu un persona aparentemente a mustra riba nan, como e ultimonan pa a usa e baño a bordo, unda cu a haya e saco cu e palabra bomb ariba. “Nos a usa e bañonan patras, y e saco a wordo haya den e baño dilanti” e amiga a sigui bisa.

Jones y Dickson tabata entre e pasaheronan cu a wordo poni riba un bus, rondona pa Transportation Security Administration (TSA) y polis di Aruba. Ta eynan un hende a haci e ‘acusacion’. A pone nan cada un den un cel separa. Aunke cu a apunta un abogado pa nan, nan no por a tuma contacto cu embahada mericano segun nan version. Despues di 26 ora deteni, a laga nan liber sin wordo acusa. A label nan si como sospechoso criminal. SouthWest Airlines a confirma e incidente, y a bisa cu autoridad local di Aruba ta encarga cu e investigacion. “Nunca mas lo mi bolbe Aruba” Jones a bisa, despues di a bishita Aruba 4 biaha. “Y mi stima Aruba. E ta un lugar bunita. E hendenan ta bunita. Pero e forma cu ley ta na Aruba, no ta corecto” Jones a finalisa bisando.

E 'incidente' a causa basta problema pa Aruba y uno costoso. Por lo menos 5 aeroliña mester a wordo desvia pa Corsou, varios na Aruba a keda cancela, y aeropuerto a keda cera pa varios ora durante un momento crucial. 

Fuente y foto Channel 4 NBC Washington