Entregamento di lista a bay sin problema mayor awe

ORANJESTAD - Esnan entrega cu e proceso di entrega di lista a wak bek riba un dia exitoso en general. Tanto polis como esnan directamente responsabel pa e entrega (Conseho Supremo Electoral) tabatin un dia pisa, pero organisa cu a pone cu tur cos a cana practicamente sin problema. Aki aya tabatin partidonan cu no a yega exactamente na tempo, pero na caminda esaki no a stroba mirando cu sea nan a keda cla prome cu tempo, of no tabatin estorbo pa otro partido. E dia a cuminsa na ora y caba na ora, y no por papia di incidentenan grave cu polis mester a atende nan mes cu ne.

CENSO

E ekipo di CSE a percura pa tin suficiente personal pa atende tanto esnan politico, como e publico. A nota cu nan tabata entrena pa atende tur asunto den un forma diligente y corecto manera mester tabata. Hopi atento porcierto, pero cortes ora cu tabata ripara cu cierto hende no por of kier a tende di nan. Tur esey a pone cu cos a cana ‘netchi’ sin ningun incidente paden y e cercania directo di Censo.

POLIS

Polis tabata e blanco di critica prome cu e ‘evento’, mirando cu nan no tabata pro pa e evento tuma lugar na Censo. Pero mirando cu no a logra e ‘bataya’ di cambia e sitio, a opta e ora pa traha un plan di atake di tal forma cu no a duna caminda pa un hende pensa mes di haci malo. Un dia anterior a presenta un draaiboek cu a duna indicacion cu polis a pensa riba tur posibel scenario cu por a surgi cu e situacionnan, basa riba experiencia. Su manece, awe mainta, hasta personal di Censo a haya nan cu sorpresa cu for di 6’or, polis y DOW a practicamente cera henter e area di Censo cu baricada. For di tempran a cera tur posibel caminda cu e partidonan politico por y kier a tuma pa parada. Esey a pone cu, hunto cu e batayon di polis poni strategicamente, un incidente tabata hopi improbabel. Aki aya sinembargo esnan di cierto partido no a cumpli cu algun exigencia, manera para e muziek na cierto caminda. Pero no obstante esey, tur a sigui orden di polis y cos a cana trankil.

FIRMA LISTA

E proximo ‘evento’ ta cuminsa dialuna ora cu un grupo di partido (cu no tin asiento den parlamento awor), mester logra acumula un cantidad di firma pa formalisa nan participacion. Nan tin un periodo pa haci esaki, cuminsando dialuna mainta na e dependence di Censo, esta ex RBC na Playa.