MEP: ‘Nos ta wak cu hende kier un cambio’'

ORANJESTAD – Partido MEP tabata na turno 1’or y mey pa entrega su lista na Conseho Supremo Electoral. Hunto cu un grupo grandi di simpatisantenan geel, nan a yega stadhuis, unda cu despues a basha cu confetti. MEP, manera NoticiaCla a raporta awe mainta caba, a publica su lista via Facebook ayera nochi. Lider di partido Evelyn Wever Croes a bisa cu desde e momento ey a ricibi hopi reaccion positivo. “Nos ta mira cu hende kier cambio” ela bisa prensa.

LISTA COMBINA

Pa loke ta e lista, e lider di partido a bisa “Nos tin un lista combina unda cu tin caranan nobo manera young professionals, pero tambe hende cu tin hopi experiencia den politica”. MEP a bisa cu nan a busca specificamente pa hende cu ta stima nan isla y no a permiti hende pa beneficio personal. “Tur 29 candidato ta sostenemi awor. Mi ta contento di ta lider di e team aki” Wever Croes a sigura prensa.

KIESVERORDENING

Wever Croes hunto cu Dangui Oduber a traha duro riba e cambio di e kiesverordening. Ainda candidatonan ta wordo eligi a base di e puesto cu nan tin riba e lista. Wever Croes a bisa caba cu e sistema aki no ta honesto. Como tal e cambio di ley mester percura pa e candidad di voto un candidato haya, ta e factor determinante pa un asiento den parlamento. Riba e pregunta di NoticiaCla, di con ta para cu e kiesverordening, e lider di partido a bisa cu e iniciativa a wordo entrega na Staten, pero cu ainda ‘e no a wordo trata’.