Total di 26 mm awacero acumula den 6 ora na Aruba

ORANJESTAD – Den apenas 6 ora, Aruba casi completo a conoce un ‘palo’ di awa diabierna, aunke no tur caminda mes fuerte. Oficialmente registra, total di 26 mm di awa a cay na METEO, 17.2 na Ponton pero cierto otro caminda no tabatin awacero. Segun METEO, den un era di cambio climatico, e tipo di yobidanan aki por bin mas biaha. Loke cu esaki ta nifica ta cu por haya lunanan y dia seco, y den un yobida fuerte, ta acumula mas awacero cu henter e luna completo.

Loke a duna Aruba e awacero torencial diabierna tabata un ola tropical, cu awor ta west di nos isla. Su tras di poco stof di Sahara, cu ta reduci e visibilidad. E humedad su tras tambe ta menos. E pronostico di tempo pa weekend ta mustra cu tin chens di awacero den ora di mainta, aunke e chens segun METEO, ta chikito. Foto Dilma Arends.