Partidonan PPA y UPP ta participa cu lista combina den eleccion

ORANJESTAD – Partido UPP y PPA a anuncia awe cu nan ta bay eleccion cu un lista combina y a yega na un acuerdo pa haci tal. Ademas nan a anuncia cu Mireille St Jago, cu siman pasa a bandona partido MEP, ta uni cu UPP. E decision pa uni forza ta pa asina haya mas forza pa tin mas chens pa e eleccion proximo. Hunto nan lo tin por lo menos 19 candidato (6 di UPP Y 13 di PPA), pero no ta descarta cu e lista aki por crece si mas partido uni. Pa loke ta e lider di e partido combina, a tira un moneda y esaki a pone cu Booshi Wever lo lidera e partido combina. E number cu Benny Nisbet, lider di PPA lo haya ainda tin cu wordo determina den reunion interno di PPA.

DIFERENCIANAN DEN PARTIDO

Mes momento NoticiaCla a puntra tanto Wever como Nisbet riba e diferencianan cu tin entre e partidonan. Wever a confirma cu lo tin diferencianan den e partidonan pa loke ta cierto punto pero nan lo no ta puntonan cu ta un deal breaker.

RACISMO Y LGBT

E portal aki a puntra St Jago, con e ta sinti cu e ta uni cu un lista combina, di cual un di e partidonan ta contra un di e principio cu el a netamente bandona e partido MEP siman pasa, esta e problema di discriminacion contra hende di color pero particularmente e problema di LGBT. Esaki pasobra den e ultimo debate (di millennials) partido UPP a bisa cu nan ta pro pareha di mesun sexo casa pa Raad na Aruba, mientras cu partido PPA a bisa enfaticamente no. St Jago a bisa di por biba cu e situacion aki manera cu e ta aworaki.

NUMERACION DI LISTA

Cu un lista combina, e lidernan ta kere cu e ta bira uno mucho mas fuerte y cu mas posibilidad. “Asina nos por hiba Aruba an e proximo nivel Nisbet a bisa. Loke ta ofrece na e pueblo, ta experiencia, debi na e figuranan riba e partidonan cu tin experiencia enorme segun Benny Nisbet. Y den tempo di crisis, mester tin un partido cu politiconan cu experiencia pa salba comunidad di Aruba, segun Nisbet. UPP tabatin 6 miembro y PPA 13 candidato. E forma di traha e lista e ora ta bira cu PPA ta haya 2 y 3, UPP 4, 5 y na 6 e ta bay om en om te number 10. Asina e lista ta sigui.