Bishita di CFT posponi pa motibo di incertidumbre

ORANJESTAD – E bishita di e representantenan di College Financieel Toezicht (e seccion di oficina y secretariado), for di Corsou a keda posponi te proximo aviso. Motibo duna ta cu despues di tuma contacto cu e organonan arubano dialuna, - cu ken nan tabatin reunionnan planea- , a bin resulta cu tin mucho incertidumbre ainda rond di e investigacion. E hecho cu diadomingo Premier Mike Eman a desmenti cu ta trata solamente di CFT, no a yuda, segun NoticiaCla por a compronde. Banda di esey, ta resulta awo cu lo no tin ni un acuerdo formal firma entre Aruba y Hulandaden forma di un protocol, sino solamente un palabracion formula den un comunicado di prensa. Unabes cu tin mas claridad riba e protocol, CFT lo por cuminsa cu e investigacionnan riba e presupuesto, manera cu tabata e intencion inicialmente.

Esey ta pone tambe cu un siman ta bolbe pasa sin nos presupuesto di pais Aruba pa 2014 no ta firma, cu tur su consecuencia cu esaki por tin pa nos isla. Minister di finanza saliente Juan David Yrausquin a mustra diadomingo un biaha mas cu mas tempo tarda pa firma, mas Aruba ta haya su mes den problemanan financiero. Un investigacion cu lo mester a tuma dos siman, posiblemente awor lo por tuma mas cu esey.

Manera cu NoticiaCla a raporta den forma di primicia den fin di siman, e representantenan di College Financieel Toezicht (CFT), mester a yega Aruba dialuna pa cuminsa cu e ronda di deliberacion riba e presupuesto di aña 2014 di pais Aruba. Minister Hulandes Ronald Plasterk su confirmacion di esaki na Hulanda, tabata un declaracion liña recta contra esun di Prome Minister Eman cu a sigura cu CFT no ta bin. Eman a sigura enfaticamente e momento ey cu ta un otro tipo di comision lo bin. Pues e declaracionnan aki a cruza otro y a crea awor mas confusion pa e comunidad, cu claridad.

NoticiaCla a confirma tambe cu e delegacion aki , - e parti di oficina y secretariado -, lo tabata lidera pa Cees van Nieuw Amerongen y mester a cuminsa reuni cu miembronan di entre otro Algemene Reken Kamer y di Raad van Advies. Loke a hala atencion diadomingo tabata ora cu NoticiaCla a confronta prome minister Eman cu e asunto di CFT, y unda cu Eman a sigura cu E comision cu ta bin investiga e presupuesto di Aruba e siman cu ta bin, no ta College Financieel Toezicht (CFT). Por lo menos segun  Premier Mike Eman. E hecho cu su colega minister hulandes Ronald Plasterk si ta referi na e comision CFT, ta keda pe. “Nos ta hopi cla den esey” Eman a cuminsa na bisa. “No ta un CFT ta bin Aruba. Nos a bisa den e acuerdo cu expertonan tanto di Aruba como di Hulanda lo haci e trabou” . Eman ta pensa cu si Hulanda kier scohe hendenan for di CFT of sociale zaken of plan bureau, ta nan bon derecho pa haci tal. “Pero no ta e instituto of organisacion CFT ta bin na Aruba.Absolutamente cu no” Eman a ripiti na NoticiaCla na mas cu un occasion diadomingo anochi. Nota: e foto (cortesia www.noticia360.com)  ta di miembronan di CFT durante un reunion na Corsou)