Erin Croes definitivamente no ta reemplaza su ruman den AVP

ORANJESTAD – Ruman muher grandi di minister Paul Croes, esta Erin Croes, definitivamente no ta subi e lista berde pa reemplaza su ruman. “ Enberdad mi a wordo acerca y a considera seriamente pa postula mi mes como candidato riba lista di AVP” Croes a bisa NoticiaCla awe mainta. “Kizas den futuro si. Why not” e ruman a sigui bisa. Mes momento el a laga porta habri pa otro ruman si subi e lista y reemplaza e ruman minister. A corda e portal aki cu nan ta 6 ruman y pues e chens ta cu un di nan si por subi.

SUBI LISTA

Croes a confirma algun tempo caba pa e portal aki den forma di primicia, cu el a wordo puntra.” E berdad ta cu mi no a considere propicio na e momentonan aki, ni tampoco e factor di ta un doño di trabou cu un Medio di comunicacion cu un tremendo reputacion y cu responsabilidadnan grandi, pa just hala esaki un banda por completo, pasobra esey lo mester a sosode.” Croes a bisa. “Mi ta considere un honor si cu partido cu un historia asina grandi a acerca e serbidora aki pa subi lista y reinforsa e team cu ta campeon caba. Mi por bisa cu alaves cu posibilidadnan pa mi persona pa por carga responsabilidadnan grandi pa nos pais despues di eleccion tambe. Sinembargo mi ta pensa cu e partido tin un team fuerte caba cu por representa partido tur cu tin” el a sigui bisa. .

SITUACION PAUL CROES

Parti di su decision tin di haber cu loke su ruman ta pasando aden aworaki. “ Mi pensamento personal ta cu mester laga e orcan fuerte aki pasa y cu lo tin un final na e etapa crucial aki riba nos ruman Paul Croes y su futuro carera den politica. El a dicidi hunto cu su partido pa miho no subi lista awo of e aña ki, loke mi ta pensa ta un bon decision tambe” Croes a sigui bisa. “ Mi ruman cu ta haye confronta cu un situacion cu e no a pidi pe, asta lo mi bisa forsá y induci politicamente riba dje den un forma inhusto, for di mentenan macabro y falso cu e mester enfrenta y pasa door di dje. Tin bes e piewnan di bo cabes ta esnan cu ta morde bo mas duro. El a haye ta tuma distancia di su encargo mas su candidatura contra su deseo pero responsablemente”. Segun Croes, e berdad ta cu esnan cu a orchestra henter e scenario aki, pa awor por ta contento cu nan a strobe pa un rato. “Na tur cu ta hari y goza, disfruta awor pasobra esaki lo no ta pa largo, just corda 'Loke bo haci nan otro lo bin bek pabo anto full force'. Lo mi no kier ta den nan zapato e momento ey ora bo castigo bati na nan porta pasobra e dia ey lo yega tambe”. Segun Croes, nan ta lubida cu e ruman ta un persona hoben, inteligente y studia pero mas cu tur un curazon honesto y ta pesey pueblo ta stim’e y ta keda kere den dje y ta apoye. “ Ser un politico briyante no ta nada facil y nos ta bib’e den carni propio. Nos sa tambe pues ta convenci cu e lo sali di e situacion completamente liber di tur acusacion falso y lodo cu frente na laira y lo tin un come back mas grandi cu nunca” e ruman muher a bisa finalmente.